Британската влада планира да забрани порнографска содржина која прикажува задушување или давење за време на сексуален однос, а поседувањето или објавувањето на такви материјали би можело да резултира со кривично гонење.
Оваа одлука е донесена поради сè поголемата загриженост за влијанието на порнографијата врз однесувањето и перцепцијата на младите за сексот и меѓучовечките односи.
Експертите истакнуваат дека проблемот не е само во насилната содржина, туку и во тоа што многумина порното го доживуваат како реалност.
„Порнографијата не е вистински живот, туку забава“
Сексуалната и партнерска терапевтка Шарлин Даглас предупредува дека порнографијата може да биде опасна доколку луѓето не ја разберат нејзината природа.
„Ако не знаете доволно за секс и мислите дека она што го гледате во порно-сцена е реално — дека така навистина изгледа сексот — тоа може да биде многу опасно“, вели Даглас.
Како пример наведува екстремни сцени, како групен секс со повеќе партнери, кои можат да бидат безбедна фантазија само ако постои знаење, комуникација и согласност.
„Во такви ситуации, луѓето кои знаат што прават однапред договараат ’сигурни зборови‘. Ако некој почувствува болка или непријатност, може да каже збор како ’црвено‘, што веднаш значи дека сè се запира“, објаснува терапевтката.
Но, таа предупредува дека многумина кои се обидуваат да го имитираат она што го гледаат на екранот, не разговараат за граници ниту за согласност, па може да се доведат во реално опасни ситуации.
„Порнографијата може да биде забавна, но важно е да се запамети дека тоа е – забава.
Не е едукација, ниту вистински приказ на животот“, заклучува Даглас.
Младите сè повеќе консумираат порнографија
Истражувањата покажуваат дека огромното мнозинство млади гледаат порнографија.
Дури 77 проценти од генерацијата Z признаваат дека редовно консумираат ваква содржина.
Повеќе од половина млади жени (52%) сметаат дека порнографијата ја засилува идејата за машка сексуална доминација, додека 36 проценти веруваат дека поттикнува насилно или агресивно однесување во спалната соба.
Половина од младите исто така изјавиле дека порнографијата им била првиот извор на „учење“ за секс, а 60 проценти од оние кои ја гледаат секојдневно признале дека им ги обликувала очекувањата за сексот и партнерството.
Две третини млади изјавиле дека им го променила она што ги возбудува сексуално, а еден од четворица признал дека со текот на времето бара сè поекстремна содржина.
