Улиците на Мадрид неодамна беа преполни со стадо овци и кози, како и со илјадници луѓе, за време на годишниот фестивал кој му оддава почит на руралното наследство на овој регион.
Парадата на овците, придружена со ѕвонење на ѕвона, блеење и музика, го привлече вниманието на бројни посетители.
Секоја година, организаторите на овој фестивал го оживуваат пасторалниот пејзаж на улиците на главниот град на Шпанија.
Фестивалот воедно укажува и на еколошките придобивки од традиционалното пасење, при што стоката се користи за расчистување на грмушки и друго запаливо ниско растениe, со што се намалува ризикот од шумски пожари.
Оваа година, според организаторите, на улиците имало околу 1100 мерино овци и 200 кози.
Шпанската престолнина се наоѓа на древна миграциска рута која била дел од огромна мрежа земјоделски патеки на Иберискиот Полуостров, пренесува „AP“.
На местото каде денес се простира градот, некогаш имало отворени полиња и шуми, испреплетени со патеки за движење на добиток. Во рамките на фестивалот, организаторите му плаќаат на градот симболичен надомест за безбеден премин на животните.
Мадрид го одржува овој фестивал од 1994 година. Слични настани организираат и помали градови во Италија, Франција и Калифорнија.
