Сепак, ние имаме избор да го видиме позитивното или да го видиме негативното во која било ситуација

Слобода на избор на сопствениот став

Можеме да избереме позитивен став без оглед на тоа што се случува околу нас. Можеме да одлучиме да ги толкуваме ситуациите од позитивната страна. Во книгата „Затвореници на нашите мисли: Принципите на Виктор Франкл за откривање смисла во животот и работата“ се нуди едноставна алатка што ја поддржуваат бројни терапевти, а произлезена е од познатиот совет на основачот на логотерапијата (психотерапевтски правец фокусиран на човековото трагање по смисла) д-р Франкл да ја применуваме слободата на избор на својот став. Алатката, односно вежбата, се нарекува 10 позитивни работи и може да ја примените на следниве начини:

Вечерна вежба која помага за добар сон

Секоја вечер, непосредно пред да си легнете, сами или со партнерот, едноставно анализирајте го денот и најдете 10 позитивни работи што ви се случиле. Ова може да вклучува: „Денес беше прекрасен ден иако врнеше дожд“, „Добив е-пошта од нашиот роднина со кого долго време не сме се слушнале“ и „Предлогот за проектот не помина, но добив насоки како да го подобрам својот пристап“.

Важно е да се напомене дека оваа вежба, дури и ако нешто лошо се случило во текот на денот, кога е лесно да се жалиме и да го видиме негативното во таква ситуација, всушност нè присилува да го пренасочиме својот фокус на позитивното.

Вежба за справување со предизвиците во односите

Размислете за ситуација која е предизвикувачка, односно непријатна, во личен однос, семејството или работата. Запишете како ја толкувате вашата ситуација, а потоа наведете 10 позитивни работи што би можеле да произлезат од неа. Запишете што е можно повеќе позитивни работи, не анализирајќи дали нешто е реално или дали е во согласност со општествените норми. Оваа вежба може да ни помогне да ги надминеме разочарувањето, фрустрацијата, стресот, па дури и лутината, за да можеме да започнеме процес на простување и исцелување.

Вежба за решавање на стресна ситуација

Кога ситуацијата е особено стресна, како што е сообраќајна несреќа, губење на работата или дијагностицирање неизлечива болест, многу е важно да преминеме на повисоко ниво на оптимизам. Ова ни помага да го одржиме не само физичкото здравје, туку и менталната сила. Наместо да ги повторувате негативните мисли, почнете да гледате во насока на можни решенија. Можеме да избереме да ја толкуваме ситуацијата од позитивната страна за да го намалиме стресот и вознемиреноста. Ние всушност го гледаме она што сакаме да го видиме. Перцепцијата не секогаш ја одразува реалноста; честопати, сепак, таа станува наша реалност. Кога веруваме дека нема доволно од ова или она во нашиот живот или кога гледаме негативно во сè, се спречуваме да живееме исполнет живот. Наместо да се фокусираме на она што го немаме или да поминуваме време жалејќи се на ситуацијата, да почнеме да го бараме позитивното во нашиот живот и да станеме благодарни за тоа.

Како што мудро советуваше Виктор Франкл: „Човекот не е слободен од условите во животот. Но, тој е слободен да заземе став во однос на нив. Условите не го условуваат во целост“.