Виталната Ен и понатаму работи шест дена во неделата во својата златара во Крескил, а често патува и до познатиот њујоршки „дијамантски кварт“. За неа тоа не е обврска, туку начин на живот.

По децении работа, Ен и натаму е ментално бистра и страсна во обезбедувањето врвна услуга за своите клиенти. Но, нејзината мотивација не е само работата. Таа цврсто верува дека токму кариерата е тоа што ја одржува во живот.

„Ако се пензионирам, би умрела. Затоа не можам да останам дома“, изјави таа за „ABC 7“.

Тајната на активниот живот

Својата тајна за долговечност и виталност ја сподели со јавноста, и таа лежи во грижата за самата себе. „Мора да станете, мора да се истуширате, мора да јадете, мора да се грижите за себе. Мора да вежбате. Ако не ви се допаѓа тоа што го работите – тогаш променете го“, порача таа.

Од продавница до златара

Нејзиниот работен век започнал уште во детството, кога го напуштила училиштето за да помага во семејната продавница во Бруклин. Кога нејзиниот сопруг заминал во Втората светска војна, таа се вработила во морнарничко бродоградилиште, а подоцна работела и како келнерка.

Денес, таа е горда сопственичка на златарата „Curiosity Jewelers“, која ја отворила далечната 1964 година. Приказната вели дека поминувала покрај локацијата, го прашала сопственикот за киријата – која тогаш изнесувала 85 долари – и одлучила да започне свој бизнис. Нејзината продавница е отворена од вторник до сабота, додека шестиот работен ден го поминува во „дијамантскиот кварт“.

Растечка популација на 100-годишници

Приказната на Ен Анџелети е дел од поширок демографски тренд. Во Њу Џерси, каде што живее, има приближно 2.646 лица постари од 100 години. Најголем процент на 100-годишници во САД има Хаваи. Популацијата на луѓе постари од 100 години во Америка брзо расте, но истражувачите од Универзитетот Нортистерн предупредуваат дека инфраструктурата не е подготвена за тоа, истакнувајќи дека 70 отсто од постарите лица во заедници со висок удел на старо население немаат соодветни услуги.

Слични трендови се бележат и во други делови од светот. Јапонија неодамна постави нов рекорд – 55-та година по ред – со речиси 100.000 жители постари од 100 години, од кои дури 88 отсто се жени.