За разлика од класичните акциони филмови, како Џон Вик или Луд Мексиканец: Пат на бесот (Mad Max: Fury Road), каде акцентот е ставен на спектакуларни борби и брканици, акционите трилери спојуваат енергија и напнатост, па секоја сцена добива дополнителна тежина. Најдобрите примери од овој жанр, како Сикарио на Дени Вилнев, покажуваат како совршено избалансираниот ритам, приказна и акција можат да создадат вистинско филмско доживување – од почеток до крај.

А ние издвоивме уште пет предлози што се одличен избор ако сте во потрага по квалитетна приказна со неизвесност што ја обликува секоја сцена.

1. „Speed“

 Полицаецот од Лос Анџелес, Џек Тревен, се соочува со луд бомбаш кој поставил бомба во автобус. Ако брзината падне под 50 милји на час, автобусот ќе експлодира. Додека се обидува да ги смири испаничените патници, Џек соработува со храбрата возачка Ени. Филмот е напната трка низ градот, каде што секоја секунда одлучува за живот или смрт.

2. „The Bourne Ultimatum“ (2007)

Џејсон Борн, човек без минато, ја продолжува потрагата по вистината за својот идентитет. Во исто време, ЦИА е по неговата трага, решена засекогаш да го замолчи. Патот го води низ Европа и Африка, каде што ги комбинира своите инстинкти и смртоносни вештини за да преживее. Приказната е исполнета со адреналински сцени и откритија што конечно го разоткриваат неговото минато.

3. „Die Hard“ (1988)

Листата не е целосна без „бисерот“ на жанрот, Брус Вилис и „Умри машки“ (Die Hard). Тој игра њујоршки полицаец, Џон Меклејн, кој доаѓа во Лос Анџелес да ја посети својата сопруга, но се најдува во средина на заложничка криза во облакодер. Група терористи предводени од Ханс Грубер ја преземаат контролата над зградата. Сам против сите, Меклејн користи памет, храброст и импровизација за да ги спаси заложниците. Филмот стана синоним за акциони трилери и роди цел серијал.

4. „The Fugitive“ (1993)

Доктор Ричард Кимбал лажно е обвинет за убиство на својата сопруга и осуден на смртна казна. По спектакуларното бегство од затвор, тој тргнува да го најде вистинскиот убиец. Неуморниот федерален агент Семјуел Жерар го следи во секој чекор. Овој трилер носи комбинација од напната потера и борба за вистината.

 5. „Léon: The Professional“ (1994)

Леон е осамен платен убиец кој живее мирно во Њујорк, додека судбината не му ја донесе на врата млада Матилда. По бруталното убиство на нејзиното семејство, таа бара заштита и одмазда. Меѓу нив се развива необично пријателство додека заедно планираат како да се спротивстават на корумпираниот полицаец Норман Стенсфилд. Филмот ги спојува емотивната драма и напнатите акциони моменти.