Велика Британија ќе ја признае палестинската држава во недела и покрај притисокот од Соединетите држави и семејствaта на заложниците што ги држи Хамас.
Британскиот премиер Кир Стармер објави во јули дека Велика Британија ќе ја признае Палестина во септември доколку ситуацијата во Газа не се подобри.
Во саботата вечерта BBC објави дека Стармер и министрите во неговата влада заклучиле дека ситуацијата на теренот се влошила последните седмици и ќе го објават признавањето на Палестина во недела попладне.
Со продолжувањето на воената офанзива и хуманитарната криза во Газа, каде што владеат очај и глад, британската влада е вознемирена од плановите за забрзување на изградбата на израелските доселенички населби на окупираниот Западен брег, што би можело да уништи секоја надеж за решението со две држави за кое се преговара со децении.
Признавањето на Палестина е голема промена во британската надворешна политика откако неколку претходни влади сметаа дека признавањето треба да дојде како дел од сеопфатен мировен договор. Сегашните британски министри тврдат дека имаат морална одговорност да дејствуваат за да ја одржат надежта за долгорочен мировен договор.
Најавеното признавање беше критикувано од водечките американски политичари, кои предупредија дека тоа ќе го зајакне Хамас и ќе ја загрози безбедноста на Израел. Републиканските лидери во Конгресот, вклучувајќи ја претседателката на Претставничкиот дом Елиз Стефаник и сенаторот Рик Скот, испратија писмо до Велика Британија, Франција, Канада, Австралија и други клучни земји со кои го објавија признавањето на Палестина.
„Ова е непромислена политика што ги поткопува перспективите за мир. Поставува опасен преседан дека насилството, а не дипломатијата, е најефикасното средство за терористичките групи како Хамас да ги постигнат своите политички цели“, напишаа Стефаник и Скот.
За време на неговата државна посета на Велика Британија, американскиот претседател Доналд Трамп рече дека „не се согласува со премиерот“ Кир Стармер за признавањето на Палестина.
Група семејства на заложници земени во нападот на 7 октомври 2023-та предупредија дека признавањето може да ги попречи напорите за нивно ослободување.
Во отворено писмо до Стармер, тие напишаа: „Вашето жално соопштение за намерата на Велика Британија да признае палестинска држава на Генералното собрание на Обединетите нации драматично ги комплицира напорите за враќање на нашите најблиски дома.
„Хамас веќе ја прослави таа одлука како победа и го прекрши договорот за прекин на огнот“.
„Ви пишуваме со едноставно барање – не го преземајте овој чекор додека нашите најблиски не се дома и во нашите раце“.
Одлуката на Стармер беше критикувана од британските опозициски конзервативци и лидерот на Реформската партија Најџел Фараж.
