На овoj пазар кавијарот се продава на лажичка, а конзерва месо од мечка чини 45 евра.
„Најсреќната земја на светот истовремено важи и за една од најскапите, но кога неодамна бев во Финска, цените во супермаркет не ми беа толкав изненадување. Сепак, стариот пазар (Old Market Hall) во Хелсинки ме збунуваше на секој чекор“, го започнува своето искуство авантуристката Ана Кабала.
„Сместен е во голема, стара зграда, во близина на пристаништето, каде што, како што забележува „Википедија“, уште од 1889 година се продаваат свежи и квалитетни прехранбени производи, а по намирници тука најчесто доаѓале повисоките слоеви. Денес навистина не знам за кого се тие цени, но халата повеќе делува како саем на финската гастрономија отколку како обичен пазар.
Очекувано, доста е бројот на туристи кои тука застануваат на ручек, а на секоја втора тезга може да се проба нешто интересно.
Девојка на една тезга ми даде парче суво месо, кое се покажa како месо од лос и беше вкусно како квалитетна пршута; потоа пробав традиционален фински колач „типалејпа“ (tippaleipä), кој обично се прави за Први мај, а беше август и баш и не ми се допадна, како обичен сув бисквит; на крај малку се загрцнав кај тезгата со кавијар, каде што само да го пробаш со лажичка чини 10 евра.
Ниту другите цени што ги забележав не се поевтини, фаворит ми е топлиот компир кој момчето кое работи го издлабува и внатре става малку лосос – за околу 17 евра.
Сепак, сè што видов некако ми падна во сенка пред конзервата мечешко месо која чини 45 евра. Јас пробав многу работи на патувањата, но ова навистина не ме заинтригира.
Потоа прочитав дека ни Финците не јадат редовно мечки, тоа им е повеќе како некоја кулинарска егзотика или традиционален деликатес.
Покрај конзервите, во понудата има и колбаси, салами, суво месо… Од друга страна, има и конзерви со слики од ирваси и лосови, секако, нешто поевтини.
Погледнете што уште снимив на пазарот во Финска и заследете го „Putničarenje“ на Инстаграм.
