Тој ги потврди шпекулациите и најави дека ќе го премести седиштето на Вселенската команда во Алабама.

„Седиштето на Вселенската команда на Соединетите Американски Држави ќе се премести во прекрасно место наречено Хантсвил, Алабама, кое отсега ќе биде познато како Рокет Сити“, рече Трамп.

Тој рече дека кога ги создал Вселенските сили во својот прв мандат, планирал да ги смести во Алабама, но администрацијата на Бајден ги сместила во Колорадо.

Трамп додаде дека оваа база ќе игра „клучна улога во изградбата на Златната купола“.

„Сите сакаат да учествуваат во тоа, во противракетниот одбранбен штит, ќе имаме Златна купола каква што никој досега не видел … Канада рече дека сака да биде дел од неа и тоа ќе биде прекрасно“ изјави Трамп.

Американскиот претседател претходно ги објави плановите за противракетен одбранбен штит по моделот на израелската Железна купола.

Инаку функциите на Вселенската команда вклучуваат спроведување операции како што се овозможување сателитска навигација и комуникација на трупи и обезбедување предупредувања за лансирање ракети.

Алабама и Колорадо долго време се бореа за Вселенската команда бидејќи има значајни импликации за локалната економија. Локацијата е исто така политички значајна, при што избраните функционери и од Алабама и од Колорадо тврдат дека нивната држава е подобра локација.

Трамп ги коментираше гласините дека починал

Кога беше прашан дали ги видел објавите на социјалните мрежи во текот на викендот што сугерираа дека повеќе не е жив, претседателот првично одговори: „Навистина? Не го видов тоа“.

Потоа зборуваше за своите активности во текот на изминатиот ден. Трамп изјави дека и покрај отсуството на јавни појавувања, дал бројни интервјуа и имал некои објави на социјалните мрежи. Додаде дека посетил и „некои луѓе“ во неговиот голф клуб во Стерлинг, Вирџинија.

„Бев многу активен за време на викендот“, нагласи тој.