Единбург е еден од најскапите градови за посета во Европа.
Тоа е истовремено и еден од најубавите градови во светот – со богата историја, готска убавина, уметничка сцена од светска класа и ресторани на секој чекор. Но, тој носи и титула на најскапата европска туристичка дестинација. Кити Крисп, новинарка на порталот „Metro“, помина 48 часа во Единбург и откри колку пари потрошила.
„Ако знаете како да се снајдете, можно е да уживате во главниот град на Шкотска и со скромен буџет – токму тоа го открив на моето неодамнешно патување. Со малку планирање, тоа можете и вие“, пишува таа. Според истражувањето на „Post Office Travel Money“, кое неодамна го прогласи Единбург за најскапа европска дестинација, главната причина за високите трошоци е сместувањето. Просечната цена за две ноќи во хотел со три ѕвезди во центарот на градот изнесува околу 470 евра.
Причината е големината на градот. Со околу 500.000 жители, Единбург е мал споредено со својата популарност – годишно го посетуваат повеќе од 4 милиони туристи. За своето дводневно патување, Крисп престојувала во хостел, во самото срце на стариот град.
Собите биле скромни – креветите не особено удобни и без никакви детали, дури ни слики на ѕидовите. Но, како што нагласува таа, не очекувала луксуз. Поентата на хостелот била неговата локација – една од најдобрите во градот.
Цените варираат од ден на ден, но ако патувате сред недела и резервирате однапред, може да поминете поповолно. Во моментот, престој во двокреветна соба чини од 80 евра по лице.
Појадокот бил вклучен – кафе од автомат, житарки и стандардна континентална понуда. Не било луксузно, но за неа било доволно, бидејќи патувала со ограничен буџет.
Во градот има многу бесплатни активности: прошетка, разгледување продавници во стариот град или искачување на „Arthur’s Seat“ со неверојатен поглед. „Nicholson Street“ е одлична за "second-hand" купување. Доколку сакате да потрошите повеќе, може да го посетите Единбуршкиот замок (влезница 25 евра).
За ручек, Крисп платила 14 евра за огромна чинија рачно изработени нудли – „одлична вредност за парите“, како што вели. Единбург нуди и многу места со евтини пици: парче маргарита чини 5 евра, додека цела пица од 35 см започнува од 16 евра. Ако сакате нешто посебно, таа препорачува џиновски стапчиња со моцарела.
Бидејќи не сакала да даде повеќе од 12 евра за вечера, застанала во едно од местата каде што парче пица чини само 2 евра. Зела две и решила вечера за 4 евра – помалку од просечната цена на едно пиво во Единбург (6 евра).
Следниот ден повторно јадела иста пица за ручек, а потоа купила кутија нудли со пилешко за 15 евра. На крајот, без да смета дополнителни трошоци за кафе и пијалаци, вклучувајќи го и скапиот кревет во хостелот, за 48 часа потрошила само 115 евра.
„И успеав да уживам во секој залак – иако динамичното формирање на цените ми остави горчлив вкус во устата“, заклучува новинарката.
