Британка остана шокирана откако платила 4.000 фунти (околу 4.700 евра) за луксузен семеен одмор во Турција, само за нејзиното дете да спие на кревет, кој како што тврди, е несоодветен, пренесува „Дејли мејл“.
Харли, која е позната под името @harleyjxo на Тикток, отпатувала во Анталија со својот партнер и двете деца во јули, каде што престојуваа во луксузен хотел, кој се рекламира како хотел со пет ѕвездички.
Во видео што го објави на Тикток, незадоволната мајка покажа како мала кафеава фотелја може да се претвори во кревет со едноставно влечење на седиштето. Таа го сумираше своето разочарување во описот на видеото: „Замислете да платите 4.000 фунти за одмор за семејство од четири члена, а тие очекуваат 11-годишно дете да спие на стол.“
Таа, исто така, ги предупреди другите туристи да го избегнуваат хотелот. „Дали е ова шега? И да им се каже дека не можат ништо да направат во врска со тоа!! Столот!! Што е ова!! Има толку многу лошо во овој хотел, а јас не сум била тука ни 24 часа! Лудо. Не резервирајте“, напиша таа, додавајќи дека на рецепцијата пронашла друго семејство чие дете плачело „затоа што го болело грбот од спиењето!“
Видеото брзо стана вирално со милион прегледи, а мислењата на гледачите беа поделени. Додека некои мислеа дека креветот е совршено погоден за дете, други се прашуваа зошто не ги проверила фотографиите од собата пред да резервира.
„Тоа е совршен кревет за дете“, напиша едно лице, додека друго додаде: „Извинете, не е ли ова нормално место за спиење дете?“
Сепак, многумина застанаа во одбрана на мајката, споделувајќи ги своите лоши искуства.
„Ова е она што ме одвраќа од Турција! Би сакала да одам, но сместувањето за семејства е шокантно!!“ коментираше еден корисник. Друг додаде: „Искрено, одвратно е. Зошто не можам да имам кревет!“ Кога едно лице ги посочи лошите критики за храната на „Трип адвајзор“, Харли одговори: „И храната е ужасна“.
