Многумина сонуваат да преземат проект за реновирање, да трансформираат нешто и да го направат свое.
Сепак, за еден поранешен сопственик на софтверска компанија, можноста да оживее напуштена наполеонска тврдина од 19 век донесе повеќе предизвици отколку што можел да замисли, пишува Би-би-си.
52-годишниот Мајк Конер го купил островот Торн, во близина на Милфорд Хејвен, Пембрукшир, за 555.000 фунти во мај 2017 година.
Градбата, позната по своите забави под претходниот сопственик, била празна 17 години, а му била потребна околу една година да ја доведе во состојба погодна за живеење.
Сега опремена со 40 кревети, четири бањи и ноќен клуб, историската градба поминала долг пат откога дури и немала вода за пиење, а сега е повторно на пазарот за 3 милиони фунти.
„Многумина тоа го опишаа како криза на средните години“, се пошегува Конер.
„Навистина не знаев во што се впуштам“, додаде тој.
Полна со историја, тврдината која првично можела да прими 100 луѓе била изградена во 1850-тите за да ги заштити сообраќајното пристаништа на Милфорд Хејвен од француските поморски напади.
Во 1947 година, била претворена во хотел и се изнајмувал за родендени, свадби и момински забави, пред да биде продадена во 1999 година.
До 2001 година била купена од хотелската група Фон Есен, која планирала да инвестира 4 милиони фунти и повторно да го отвори хотелот, со жичарница за пристап од копното.
Но, била претежно напуштена кога Конер ја купил, а некогаш раздвижениот остров за забави бил оставен да се распаѓа.
„Немаше струја, немаше вода, а целата храна и отпад мораше да се вратат“, рече тој.
„Сопругата ми беше доста лута кога првпат и реков дека го купив, рече дека ќе дојде само кога ќе има функционален тоалет, што е сосема разумно“, раскажа Конер.
Целиот процес на реновирање на островот Торн траел речиси пет години, а шест лица живееле на островот околу четири години додека се одвивале работите.
Голем дел од опремата била донесена со хеликоптер, што Конер го опиша како „неверојатно тешко“ поради локацијата.
Тој додаде дека набавката на материјали била исклучително комплицирана, но и голем предизвик за оние кои се согласиле да работат на проектот и да живеат на островот.
„Повеќето луѓе кои се приклучија на проектот и понатаму ги ангажирам“. Едноставно не можете да предвидите колку луѓето сакаат да ви помогнат“, рече тој.
Работниците останувале на островот по две недели.
„Ги полнеа своите телефони на генератор, а за капење мораа да скокаат во морето. Животот беше тежок“, раскажа Конер.
Конер, кој по професија е наставник по дизајн и технологија, рече дека е највозбуден од процесот на обликување.
Тој додаде дека не може да поверува дека Викторијанците можеле да изградат нешто толку величествено, што го инспирирало да продолжи.
„Илјада луѓе работеа на ова две години, беше изградено на ист начин како Стоунхенџ. Чувствував дека е моја задача да го модернизирам“, рече Конер, додавајќи дека реновирањето било прашање на тоа како новото да функционира со старото.
„Тоа е речиси како омаж кон нивниот труд, а вие само го додавате тој последен мал дел на она што веќе беше неверојатно“, додаде тој.
Според Конер, островот „видел сè“ – од забави со 80 лица до „целосен мир како огледало на вода“.
Без „соседи што би можел да ги вознемири“, островот беше домаќин на сопствениот фестивал за 50-тиот роденден на Конер, на кој учествувал и акробат на јаже во живописниот двор.
„Луѓето што доаѓаат за време на викендот се изненадени кога им давам кеса за ѓубре и им велам дека мора да ја вратат назад – никој не доаѓа тука да собира ѓубре“.
Како поранешен директор, Конер го опишал своето време на островот како „прекрасно“, бидејќи успеал да ги заборави своите дневни рутини.
„Сите живееме според календари и состаноци, но островот е сосема спротивното – тој е надвор од мрежата“ истакна Конор.
Како што рече времето застанува на островот, додавајќи дека бидејќи секогаш нешто се случува, луѓето имаат тенденција да ги остават своите телефони настрана.
„Мислам дека тоа е она што го прави Торн посебно место – луѓето се присутни“, рече Конор.
Зборувајќи за иднината на островот, Конер рече дека се надева дека новиот сопственик ќе ужива во него колку што уживал и тој, но исто така рече дека има огромен потенцијал да стане туристичка атракција или да биде домаќин на „најневеројатните рејв забави“.
Тој додаде дека ја замислува локацијата како место за „неверојатно 24-часовно искуство“, кое може да прими околу 800 луѓе.
