„Reddit“ планира во наредните месеци уште повеќе да се фокусира на пребарувањето.
Компанијата веќе работи на план за интегрирање на своето пребарување засновано на „LLM“ (големи јазични модели) во главната функција за пребарување, но извршниот директор Стив Хафман вели дека сака корисниците да почнат да го гледаат сајтот како вистински пребарувач.
За време на последниот извештај за заработка, Хафман изјави дека пребарувањето е еден од главните приоритети за „Reddit“.
„Ги насочуваме нашите ресурси кон области што ќе донесат резултати во однос на нашите најважни потреби – подобрување на основниот производ, позиционирање на „Reddit“ како главен пребарувач и проширување на меѓународно ниво“, рече тој.
Идејата „Reddit“ да стане пребарувач не е толку нереална. Многу корисници веќе рутински додаваат „Reddit“ во своите пребарувања на „Google“ за да најдат релевантни дискусии од сајтот.
Компанијата се обидува да ја искористи оваа навика преку својот производ за пребарување базиран на вештачка интелигенција, наречен „Reddit Answers“.
Иако оваа функција сè уште е во бета фаза на тестирање, компанијата планира во иднина да ја вклучи во стандардното поле за пребарување.
„Нашиот моментален фокус е да го обединиме пребарувањето на „Reddit“ – традиционалното пребарување што е многу користено – и новиот производ „Reddit Answers“ во едно унифицирано искуство за пребарување, кое ќе го истакнеме во апликацијата“, рече Хафман.
Изјавите на Хафман доаѓаат во момент кога вештачката интелигенција сè повеќе го презема фокусот од класичните пребарувачи.
Се чини дека дури ни „Reddit“, кој има договор за лиценцирање на податоци со „Google“ вреден повеќе милиони, не е имун на овие трендови, пренесува „B92“.
