Отворена во 1984 година на работ на Газијпур, во источниот дел на Делхи, депонијата го достигнала својот максимален капацитет уште во 2002 година, но оттогаш пораснала во рид висок дури 72 метри. Веќе е една од најголемите депонии за отпад во светот, но и понатаму секојдневно прима стотици тони ѓубре од Делхи.

Токсичен чад

Газијпур претставува голема опасност за милионите луѓе кои живеат во Делхи. Смрдеата што се шири од таму е речиси неподнослива, особено во лето, а пожарите кои редовно избувнуваат ја обвиваат околната област со густ, токсичен чад. Стрмните падини од отпад често се уриваат, затрупувајќи луѓе и тони ѓубре.

„Гледам како расте. Сите влади ветуваат дека ќе го решат проблемот, но ништо не преземаат“, изјавил за „Sky News“ 71-годишниот Ибрахим Кан и додал:

„Сите што живеат во близина се разболуваат, тешко е да се дише. Јас сум срцев болен и имам проблеми со дишењето.“

Во септември 2017 година, повеќе од 50 милиони тони отпад се срушиле кога дел од планината ѓубре се урнала, затрупувајќи десетици луѓе и возила. Во април 2024 година избувнал голем пожар кој создал густ чад и предизвикал сериозни здравствени проблеми и потешкотии со дишењето во околните квартови.

Издигнувајќи се над Делхи, депонијата оддалеку изгледа како природно ритче, но штом ќе ѝ се приближите, самиот мирис го открива нејзиното вистинско потекло – отпад создаден од човекот.

Овој „Еверест од ѓубре“ може да изгледа импресивно по својата големина, но проблемите што ги предизвикува за животната средина и локалното население се огромни.

За жал, и покрај бројните ветувања од локалните власти дека ќе ја ублажат штетата што ја предизвикува Газијпур, никој сè уште не успеал да го запре неговото ширење. Ридот од ѓубре секоја година во просек расте за десет метри. Делхи секојдневно произведува повеќе од 11 илјади тони отпад, а голем дел од него завршува токму таму, правејќи го Газијпур сè поголема опасност.