Генералот Мајкл Курила, командант на Централната команда на американската војска (CENTCOM), кој е задолжен за Блискиот Исток, се сретна со претседателот Доналд Трамп и му ги претстави воените опции во врска со Иран.
Ова го изјави извор запознаен со деталите од состанокот за израелскиот весник „Џерусалем пост“.
Самиот Курила го поддржува американското придружување на израелските напади и е добро запознаен и со оперативните планови на САД и со израелските воени капацитети, благодарение на неговата улога како командант на „CENTCOM“ од 2022 година.
Се вели дека не е случајно што, според медиумските информации, Израел решил да го нападне Иран пред Курила да ја напушти позицијата.
Кон крајот на октомври 2024 година, „NBC News“ објави сторија за обвинувања против Курила дека тој турнал подреден офицер и дека мандатот на командантот на „CENTCOM“ обично трае три години, па затоа се очекуваше тој да ја напушти функцијата на 1 април оваа година, но мандатот очигледно му бил продолжен.
Доколку Трамп нареди напад врз Иран, Курила ќе биде тој што ќе ја води операцијата.
Извор запознаен со деталите од состанокот изјави за „Џерусалим пост“ дека Трамп внимателно слуша што Курила има да каже и го почитува овој генерал.
„Трамп би бил задоволен ако Иранците се согласат на договор што тој го опишува како „предавање“. Бидејќи тоа не е на повидок, работната претпоставка е дека тој ќе нареди нападот“ изјавија израелски и американски извори за овој весник.
„Волстрит џурнал“ исто така објави дека Трамп ги одобрил плановите за напад врз Иран, но одбил да издаде конечна наредба.
Американскиот дневен весник, повикувајќи се на извори запознаени со ставовите на шефот на Белата куќа, објави дека Трамп им рекол на високо рангираните соработници дека чека да види дали Техеран прво ќе се откаже од својата нуклеарна програма.
Се вели дека „бомбите за разбивање бункери“ на Пентагон ќе бидат еден од ретките начини на кои Израел би можел да уништи некои од подобро заштитените цели.
На пример, нуклеарната постројка Фордоу се наоѓа во планина, длабоко под земја и надвор од дофатот на сите освен на најмоќните бомби.
Трамп рече дека „изгубил трпение“ со Иран, но дека сè уште не одлучил дали САД ќе интервенираат.
Си-ен-ен од неименувани извори дознава дека главната цел на Трамп е да избегне пролонгирање на конфликтот.
Американската телевизија извести дека тој прифаќа аргументи, вклучително и од Израел, дека само Америка може да стави крај на нуклеарните амбиции на Иран, но се плаши дека би можел да биде вовлечен во конфликт во странство за кој вети дека ќе го избегне.
