„Hermit’s Castle“ (Замокот на Пустиникот) често се нарекува најмалиот замок во Шкотска и Европа, а некои велат дека е и најмалиот во светот.
Оваа интересна градба зафаќа површина од само околу 10 квадратни метри во заливот Ахмелвич во близина на селото Лохинвер во северозападна Шкотска.
Фразата „најмалиот замок во Европа“ е во наводници бидејќи повеќето луѓе го сметаат за бетонски бункер со интересна архитектонска форма со шармантна кула, а со сопствени раце го изградил англискиот архитект Дејвид Скот во 1950-тите.
За изградбата на замокот во бруталистички стил му биле потребни шест месеци, а легендата вели дека го напуштил ден откако бил завршен – и никогаш повеќе не се вратил.
Скот го замислил ова место како место за тивка контемплација . Изградено целосно од бетон, составено од една просторија со подигната платформа за одмор, огниште и вградени полици.
Просторот е неправилен – не поширок ниту повисок од два метри. Нема вода, електрична енергија или мебел.
Иако се наоѓа во близина на популарната плажа Ахмелвич, многу луѓе не се свесни за неговото постоење. Минувачите и планинарите често се изненадени кога ќе го откријат овој минијатурен замок веднаш до брегот. Сепак, тој е отворен и бесплатен за истражување без никаков надомест.
