И не, не се работи само за прашања од типот „колку долго се варат јајца“ или помош за домашна задача. Младите поставуваат сериозни прашања како: „дали да ја прекинам врската?“, „како да бидам свој?“, „што да правам со кариерата?“ – "ChatGPT" е тука за сè, дури и за најбаналните дилеми.

На настанот "AI Ascent", извршниот директор на "OpenAI", Сем Алтман, изјави дека повозрасните корисници го гледаат "ChatGPT" како напредна верзија на "Google". Но младите? Тие го користат како животен советник, па дури и како дигитален асистент кој им помага со сè: од училишни обврски до емотивни кризи.

Интересен факт: Повеќе од една третина од Американците на возраст од 18 до 24 години користат "ChatGPT". И не само кога заглавуваат со есеј. Многумина го користат секојдневно – го поврзуваат со "Google Drive", пишуваат мејлови, водат белешки, па дури и бараат совет како да одговорат на порака.

Колку добро нè познава "ChatGPT"?

"ChatGPT" знае сè за нив – кои им се пријатели, каков им е распоредот, што ги мачи – бидејќи има меморија и ги помни разговорите. Алтман тоа го резимираше едноставно: „Не носат животни одлуки без да прашаат "ChatGPT"“.

Се разбира, не се сите воодушевени. Експертите предупредуваат дека "AI" моделите се по природа социопатски и дека треба да се внимава кога се бара совет за здравје, врски или живот воопшто. Некои предлагаат етички насоки, бидејќи не секој „паметен“ совет е и вистински исправен.

Според "Pew Research", дури 26% од тинејџерите (13 – 17 години) го користат "GPT" за училишни задачи – двојно повеќе од минатата година. Калифорнија дури разгледува закон кој би наложил AI да ги предупреди младите со порака: „Здраво, не зборуваш со човек – ова е бот.“

Алтман го спореди ова со појавата на смартфоните – постарите се мачеа со иконки и повлекувања, додека децата инстинктивно ги знаеја сите кратенки.