Но, што навистина покажува студијата на која се повикува „BBC“ – и дали таквите заклучоци стојат кога ќе се стават во поширок контекст? Дали е време за пиво?

Истражување објавено во списанието „Journal of Agricultural and Food Chemistry“ ја анализирало содржината на витамин Б6 во алкохолните и безалкохолните пива. Витаминот Б6 е важен нутриент кој учествува во бројни процеси во организмот, но проблемот се појавува во начинот на кој се интерпретираат резултатите, пишува „Science Alert“.

„15 отсто од дневните потреби“ – импресивно, но лажливо

Бројките се точни, но можат да бидат погрешно сфатени надвор од контекст. Тврдењето дека едно пиво обезбедува околу 15 отсто од дневните потреби за витамин Б6 звучи значајно, но не ја зема предвид целокупната исхрана.

Поголемиот дел од луѓето во Обединетото Кралство, на пример, немаат дефицит од овој витамин, а истата количина лесно се внесува преку стандардна исхрана.

Витаминот Б6 се наоѓа во компири, наут, житарици, месо, зеленчук и други намирници – без никаква потреба од алкохол.

Нема докази за „корист за мозокот“

Студијата наведува дека витаминот Б6 е важен за создавање на серотонин и допамин, како и дека е присутен во пивото, но не докажува дека консумирањето пиво има мерлив ефект врз здравјето на мозокот, расположението или когнитивните функции.

Со други зборови, тврдењето дека пивото „го подобрува работењето на мозокот“ не е поткрепено со податоци.

Проблем со количините и контекстот

Студијата споменува и порции од половина литар, па дури и до еден литар пиво. Во тие количини, редовната консумација би била во спротивност со здравствените препораки.

Исто така, за пивото да може да се смета за „извор на витамини“, би требало да ја обезбеди целодневната потреба за Б6 во една стандардна порција – што ниту едно испитано пиво не го достигнува.

Алкохолот и здравствените ризици

Она што често се изоставува од ваквите интерпретации е фактот дека алкохолот носи добро познати здравствени ризици – вклучувајќи заболувања на црниот дроб, зголемен ризик од рак и негативни ефекти врз мозокот.

Светската здравствена организација наведува дека не постои безбедно ниво на консумација на алкохол.

Стар наратив за „здрав алкохол“

Ова не е првпат алкохолот да се прикажува во позитивно светло. Идејата дека чаша црвено вино е „добра за срцето“ долго време е присутна во јавноста.

Таа произлегува од таканаречениот „француски парадокс“, но подоцнежните студии покажаа дека во игра се и други фактори – исхрана, физичка активност, социоекономски статус и пристап до здравство.

Заклучок: повеќе мит отколку бенефит

Иако пивото содржи одредени хранливи материи, нивната количина е мала и тешко може да има значително влијание врз здравјето.

Нутриенти како витамини, антиоксиданси и минерали можат многу побезбедно и поефикасно да се внесат преку овошје, зеленчук, мешунки и интегрални житарки – без ризикот што доаѓа со алкохолот.