Рускиот претседател Владимир Путин во петок ќе одржи говор на „најголемата“ досега одржана воена парада во Москва по повод Денот на победата, со која се одбележува победата над нацистичка Германија во Втората светска војна.

Русија го слави Денот на победата повеќе од три години по почетокот на инвазијата врз Украина, која и понатаму е под постојани напади, и покрај напорите на американскиот претседател Доналд Трамп да стави крај на војната.

Путин нареди тридневен прекин на огнот во Украина поради одржувањето на овој настан.

Украина го осуди овој потег и соопшти дека не може да преземе одговорност за тоа што би можело да се случи во Русија на тој ден, откако некои држави ја замолиле да обезбеди безбедност за своите лидери кои ќе присуствуваат на парадата.

Три дена пред парадата на Црвениот плоштад во Москва, Украина во текот на ноќта лансираше повеќе од 100 дронови кон Русија, вклучително и кон Москва, што доведе до затворање на аеродромите со часови.

„Најголемата воена парада досега“

И покрај конфликтот, руските власти ветуваат дека прославата на 80-годишнината од победата над нацистите ќе биде „најголема досега“. Путин го претвори 9 Мај во празник што го слави државниот суверенитет и патриотизмот. Централниот настан е големата воена парада на Црвениот плоштад, на која Путин ѝ се обраќа на нацијата.

Путин го користи наративот од Втората светска војна за да ја оправда инвазијата на Украина, ветувајќи „денацификација“ на земјата и споредувајќи го конфликтот со советската борба против нацистите.

Често го обвинува Западот дека не ги признава придонесите на Русија во победата во Втората светска војна и тврди дека Советскиот Сојуз бил главниот победник во војната.

Во пресрет на прославата, Путин посебно го велича рускиот народ за победата над нацистите, истакнувајќи го неговиот „најголем придонес“ меѓу сите народи на Советскиот Сојуз.

„Сите народи на Советскиот Сојуз дадоа голем придонес … Но, секако, поради својата големина, Руската Федерација придонесе најмногу за таа победа“, изјави Путин пред студенти во Москва минатата недела.

„Големата татковинска војна“

Во Русија, Втората светска војна официјално се нарекува „Голема татковинска војна“. Официјалните учебници не го спомнуваат периодот од 1939 до 1941 година, кога Советскиот Сојуз имал пакт за ненапаѓање со нацистичка Германија и извршил инвазија врз Полска.

Советскиот Сојуз изгубил повеќе од 20 милиони војници и цивили во Втората светска војна.

Путин ги претставува своите борци како херои против фашизмот, а Украина ја нарекува „ултранационалистичка држава“, споредувајќи ја со нацистичкиот окупациски режим што владеел со земјата од 1941 до 1944 година.

Украина остро ја критикува прославата на Денот на победата во Москва, тврдејќи дека парадата „нема никаква врска со победата над нацистите“ и дека учесниците на парадата „многу веројатно се вклучени во злосторства против Украинците“.

Дваесет светски лидери во Москва

Поканата за присуство на прославата на Денот на победата во Москва ја прифатиле околу 20 светски лидери, вклучително и кинескиот претседател Си Џинпинг, соопшти Кремљ.

Москва не ја исклучува можноста севернокорејски војници – кои ѝ помогнаа на руската војска да ги потисне украинските сили од регионот на Курск – за првпат да учествуваат на парадата.

Европската Унија ги предупреди своите лидери да не патуваат во Москва за овој настан. Но, словачкиот премиер Роберт Фицо реши да оди.

„Ќе одам. Точка“, изјави тој во видеопорака објавена на социјалните мрежи во понеделникот.

„Разбирам дека војната е во тек. Но нема да ја мешам сегашноста со она што се случувало меѓу 1941 и 1945 година“, рече Фицо.