На својот Инстаграм профил, нутриционистката Наташа Алексиќ го отвори прашањето што многумина си го поставуваат – што точно има во лебот што трае по неколку недели, а изгледа ист како првиот ден?

Што всушност јадеме?

– Кога купувате леб со продолжен рок, важно е да знаете дека тој најчесто содржи калциум пропионат (Е282), калиум сорбат (Е202) и други хемиски додатоци кои го спречуваат развојот на мувла – објаснува Алексиќ.

Иако овие адитиви се дозволени и се сметаат за „безбедни за употреба“, според неа, некои истражувања покажуваат дека при честа и прекумерна консумација, може да дојде до иритација на дигестивниот систем и нарушување на цревната микрофлора.

– Колку е подолг рокот на траење, толку повеќе E-броеви има на декларацијата: E281, E282, E202, E300… – предупредува таа.

Што е подобар избор?

Нутриционистката препорачува избегнување на ваквите производи и охрабрува консумирање на свежо подготвен леб од пекари, како и ферментиран леб од цело зрно.

Овие алтернативи, според неа, не само што имаат подобар вкус, туку и:

• Поголема хранлива вредност

• Подобро влијаат на цревната флора

• Содржат помалку или без адитиви

– Лебот треба да биде свеж, нутритивно богат и без вештачки додатоци. Ако може да стои на полицата со недели без да се расипе – треба да се запрашаме што всушност јадеме – заклучува Алексиќ.

Прочитајте ја декларацијата – и посегнете по подобра опција

Следниот пат кога ќе пазарите, фрлете поглед на состојките и размислете дали вреди да се избере „удобноста“ на рокот на траење или вредноста на она што го внесуваме во телото. Лебот е секојдневна храна – токму затоа квалитетот е поважен од квантитетот.