Кога минатата година "Alphabet", матичната компанија на "Google", објави одлични деловни резултати за првиот квартал, дел од вработените изразија незадоволство, сметајќи дека ваквите резултати не биле проследени со соодветни награди. На интерните форуми на компанијата тогаш почнаа дискусии за забележлив пад на моралот, зголемено незадоволство и сè поголема оддалеченост меѓу раководството на "Google" и вработените.

Меѓу објаснувањата кои тогаш ги дадоа извршниот директор Сундар Пичаи и финансиската директорка Рут Порат беше и аргументот дека компанијата „инвестира во раст“ и дека приходите треба да растат побрзо од трошоците.

Слична тема беше иницирана и на неодамнешен состанок меѓу вработените и нивните претпоставени, чии детали протекоа во јавноста преку "Business Insider", кој ги објави информациите.

Намалени бонуси и разлики во компензациите

Едно од главните прашања што ги загрижуваше дел од вработените беше зошто нивните компензации биле пониски во споредба со претходната година, иако "Google" остварува стабилни финансиски резултати. Компензациските пакети на компанијата обично вклучуваат основна плата, различни бонуси и награди.

Најголемите награди за најзаслужните

На ова прашање одговори потпретседателот на "Google" за глобални компензации и бенефиции Џон Кејси, кој изјави дека повеќе од 80% од вработените добиле поголеми компензации за 2025 година. Сепак, останатите немале таква среќа и, покрај добрите резултати, добиле помали финансиски пакети од минатата година или помалку од очекуваното.

Според Кејси, станува збор за вработени кои имаат помалку технолошки улоги на одредени пазари. Поголеми покачувања добиле оние со најголем придонес, бидејќи структурата на компензациите е осмислена да ги награди најдобрите вработени, кои се сметаат за клучни за успехот на компанијата.

Во одговорот за "Business Insider", од "Google" изјавија дека нивниот овогодишен компензациски циклус е сличен на минатогодишниот и дека продолжуваат со усогласување на платите со локалните пазари.