Технолошкиот милијардер беше уапсен во август 2024 година под обвиненија дека не ја модерирал апликацијата според правилата, дозволувајќи канали зад кои стојат криминални групи.

Дуров негира дека одбил соработка со органите за спроведување на законот во врска со трговијата со дрога, содржините поврзани со сексуална злоупотреба на деца и измами.

Телеграм претходно демантираше дека немало доволна модерација на содржината на платформата.

Ова беше првпат еден технолошки лидер да биде уапсен поради криминални активности на неговата платформа.

„Процесот е во тек, но е прекрасно чувство да се биде дома“, напиша Дуров на Телеграм.

Детали за апсењето и ослободувањето

Овој 40-годишен бизнисмен беше уапсен во август 2024 година кога неговиот приватен авион слета во Париз, а француските судии првично не му дозволија да ја напушти земјата.

Меѓутоа, обвинителството во Париз во понеделникот за "BBC" соопшти дека судскиот надзор врз него е привремено укинат во периодот од 15 март до 7 април.

Не беа објавени детали за условите под кои му беше дозволено да ја напушти Франција.

Дуров живее во Дубаи, а роден е во Русија, чие државјанство го поседува. Освен тоа, тој има и државјанства на Франција, Обединетите Арапски Емирати и карипската островска држава Сент Китс и Невис.

Телеграм е особено популарен во Русија, Украина и земјите од поранешниот Советски Сојуз, како и во Иран.

Промени во Телеграм по апсењето на Дуров

Телеграм го користат околу 950 милиони луѓе ширум светот и досега беше позициониран како апликација што ја штити приватноста на корисниците.

Меѓутоа, истрагите на "BBC" и други медиумски организации покажаа дека криминални групи ја користат платформата за рекламирање дрога, услуги поврзани со сајбер-криминал, измами, како и за споделување содржини поврзани со сексуална злоупотреба на деца.

Поради ова, еден експерт го нарече Телеграм „мрачниот интернет (dark web) во вашиот џеб“.

Компанијата претходно изјави дека апсењето на Дуров било неправедно и дека тој не треба да биде одговорен за тоа што прават корисниците на платформата.

Од својот дом во Дубаи, Дуров им се заблагодари на француските судии што му дозволиле да се врати дома, како и на неговите адвокати за „напорите да докажат дека, кога станува збор за модерација, соработка и борба против криминалот, Телеграм со години не само што ги исполнува, туку и ги надминува законските обврски“.

Сепак, по апсењето на Дуров, Телеграм воведе низа промени во своето работење.

Компанијата се приклучи на програмата на "Internet Watch Foundation", чија цел е откривање, отстранување и пријавување на содржини поврзани со сексуална злоупотреба на деца што се споделуваат на интернет.

Телеграм исто така најави дека IP-адресите и телефонските броеви на оние што ги прекршуваат правилата ќе бидат предадени на полицијата, во согласност со законите.

Дополнително, платформата почна да објавува извештаи за количината на содржина што е отстранета, што е стандардна практика во технолошката индустрија, но нешто што претходно не го правеше.

Портпаролот на Телеграм изјави дека компанијата секојдневно модерира содржини и отстранува милиони штетни објави, додавајќи дека „за жал, криминални активности постојат на секоја платформа, и покрај напорите тие да се спречат“.