Разликата помеѓу „да се употреби до“ и „најдобро да се употреби до“

„Да се употреби до“ означува безбедносен рок, особено за расипливи производи како месо, риба и млечни производи. Овие намирници не треба да се консумираат по тој датум.

„Најдобро да се употреби до“ го означува рокот на оптималниот квалитет, но производот честопати може да се консумира и после тоа доколку не постојат знаци на расипување.

Намирници кои траат подолго отколку што мислиме

Тестенини и ориз – сувите тестенини и оризот можат да траат со години по нивниот рок на употреба доколку се чуваат на суво место.

Конзервирана храна – доколку конзервата не е оштетена, храната во неа може да биде безбедна со години по истекот на рокот.

Мед – практично никогаш не се расипува, може да кристализира, но сепак е јадлив.

Шеќер и сол – немаат рок на траење бидејќи не го поддржуваат растот на бактериите.

Чоколадо – може да развие бел слој (наречен „fat bloom“), но и понатаму е безбедно да се консумира.

Намирници кои треба внимателно да се проверат

Млеко и млечни производи – може да траат неколку денови по истекот на рокот, но треба да ги мириснете и да ја проверите текстурата. Доколку овие производи се сè уште неотворени, поверојатно е дека ќе можат подолго да се консумираат по испишаниот датум на истекување – на пример, павлака или сирни намази.

Јајцата можат да траат неколку недели по истекот на рокот доколку се складираат правилно. Тестирајте ги така што ќе го ставите јајцето во вода – ако потоне, уште е свежо, а доколку плута, подобро е да го фрлите.

Сушено овошје и јаткасти плодови – може да траат подолго, но јаткастите плодови можат да станат горчливи – па затоа можете да ги чувате во фрижидер.

Според студиите, дури 60% од храната што се фрла сè уште е безбедна за консумирање. Организациите како што се ФАО и СЗО ја нагласуваат важноста од намалување на отпадот од храна и подобра едукација на потрошувачите за рокот на употреба.