Жител на Шангај загубил повеќе од 26.000 евра откако бил намамен во онлајн врска со измислена девојка создадена со вештачка интелигенција.

За измамата бил користен софтвер за вештачка интелигенција, кој креирал видеа и фотографии на измислена млада жена, пренесува кинескиот "CCTV".

Жртвата префрлила речиси 200.000 јуани (околу 26.250 евра) на банкарската сметка на својата „девојка“.

Биле користени лажни видеа и фотографии за да се убеди жртвата дека на девојката ѝ се потребни пари за да започне бизнис и да му помогне на свој близок со медицински трошоци.

Притоа, жртвата никогаш не ја запознала својата наводна партнерка во живо, пренесува "B92", повикувајќи се на "Бета".

Зголемена популарност на AI „партнери“

Овој случај покажува колку овој вид измами стануваат сè пораспространети, а доказ за тоа е и AI генерираната „девојка“ "Aika Kiti", која пред Денот на вљубените добила повеќе од 500 запросувања – иако не е вистинска личност.

Оваа дигитална личност заработува околу 5.000 фунти месечно на платформата Fanvue, каде што претплатниците можат да комуницираат со "AI" ликови.

Според податоците на Институтот за јавни политики и истражувања (IPPR), бројот на корисници на овие сервиси расте секој ден.

"Aika Kiti" е еден од најуспешните примери на дигитални инфлуенсери, а нејзините креатори тврдат дека таа не само што привлекува внимание, туку и гради лојална база на обожаватели, подготвени да платат за комуникација со неа.