Во текот на Австралија Опен, српскиот тенисер Новак Ѓоковиќ повторно се најде под удар на австралиските медиуми, кои ја доведоа во прашање неговата искреност за наводната повреда на ногата.
Според текстот на Калум Дик во „Австралиецот“, повредата која Ѓоковиќ ја заработил за време на мечот се смета за сомнителна:
„Повреда или тактика – чудниот случај на Новак Ѓоковиќ“, пишува Дик, алудирајќи дека тенисерот можеби ја користи ситуацијата како психолошко оружје против своите противници.
Во сличен стил, Малколм Нокс од „The Age“ тврди дека „тактичката повреда“ е дел од професионалниот репертоар на Ѓоковиќ. Во својот коментар, Нокс отворено го обвинува Ѓоковиќ за манипулации и симулации:
„Што треба да прави човек откако ќе стане најголем? Светот не е доволен. Треба да бидеш најсилен, најголем херој во надминувањето на болката, најлукавиот, најавтентичниот…“
Нокс оди подалеку, опишувајќи го Ѓоковиќ како фигура која бара апсолутна почит и прави невкусна споредба со Господ и Доналд Трамп. Тој вели дека Новак „издава наредби“ од теренот и дека неговите долги подготовки за удар се дел од стратегијата која ги вознемирува противниците и публиката.
Негативните ставови на австралиските новинари не запираат тука. Сагата од 2022 година, кога Ѓоковиќ беше депортиран поради ковид-мерките, останува тема која редовно се поврзува со него. Во секој текст што го анализира неговото однесување, неизбежно се споменува неговото искуство од Мелбурн и контроверзите што следеа по тоа.
И покрај непобитните тениски достигнувања и мајсторство, австралиските медиуми продолжуваат да го прикажуваат Ѓоковиќ како контроверзна и негативна фигура. Тениските успеси често се засенети од обвинувањата за нечесна игра, што дополнително го подгрева антагонизмот кон еден од најуспешните спортисти на сите времиња.
