Најскапиот автомобил во историјата е еден од двата постоечки "Mercedes 300 SLR Uhlenhaut", кој го промени сопственикот во 2022 година за 135 милиони евра.

Сепак, како што пишува "Jutarnji list" ова уникатно "Lamborghini" постигна речиси иста цена и покрај тоа што е значително понов од споменатиот "Mercedes" и не е класичен модел.

"Lamborghini Egoista"

"Lamborghini Egoista", создаден во 2013 година за да ја прослави 50-годишнината на брендот, наводно е продаден за неверојатни 117 милиони долари, што е околу 113 милиони евра.

Така барем тврди страницата „wealth“ на Инстаграм. Објавата од 11 јануари 2025 година има над 100.000 лајкови и е споделена повеќе од 10.000 пати.

Веста ја пренесоа и некои блогови и медиуми. Но, дали оваа информација е веродостојна? Во секој случај, објавата не дава докази или извор за оваа продажба.

"Egoista" е импресивен единствен примерок претставен во 2013 година за да ја прослави 50-годишнината на "Lamborghini".

Врз основа на "Lamborghini Gallardo", дизајнерот Валтер де Силва создаде спортски автомобил кој повеќе наликува на воен авион отколку на класично возило. Сериско производство или дури и многу ограничена серија никогаш не била планирана.

Како што сугерира името, "Egoista" е единствен со само едно седиште. За да се влезе во него, се крева целата купола на кокпитот, слично како кај борбените авиони.

Внатрешноста на "Egoista" вклучува тркачко седиште со ремен во четири точки, а контролната табла е дизајнирана да биде едноставна и функционална, надополнета со "head-up" дисплеј.

Назад се наоѓа легендарниот 5,2-литарски V10 мотор од "Gallardo", чија точна моќност не е објавена, но се проценува на околу 600 коњски сили.

Иако автомобилот е во состојба за возење, тој не е легален за пат, бидејќи е концептно возило.

Дали цената е реална?

Познато е дека "Egoista" беше продаден на почитуван колекционер на "Lamborghini", но цената никогаш не беше официјално објавена.

Цената од 113 милиони евра делува астрономска, но не е невозможна со оглед на бројот на мултимилијардери во светот денес.

Сè додека не се појават сигурни извори кои ќе ја потврдат цената, остануваме скептични.