Реал Мадрид и Барселона вечерва од 20 часот ќе водат битка за трофејот во Супер Купот на Шпанија, титула која може многу да значи за продолжението од оваа сезона.
Ова ќе биде втор сезонски меч на големите ривали, првиот убедливо им припадна на каталонците и тоа со 4-0 на „Сантијаго Бернабеу“. Ваквиот резултат е доволна мотивација за „кралевите“ да побараат реванш, одмазда, а пак за Барса да потврди дека е подобра од „кралевите“, односно дека е подготвена за големи работи во натпреварувачката 2024/2025.
Ињиго Мартинез ако нема некое изненадување во последен момент треба да биде стартер кај Барселона што значи дека одново ќе има одговорна улога во дефанзивната. Тој е мотивиран и верува дека ја имаат формулата за успех над тимот кој го брани пехарот во ова натпреварување.
-Знаеме што треба да направиме, каде да го нападнеме Реал Мадрид и каде можеме да ги добиеме. Одиме на нив, полни со самодоверба и со повеќе од способен состав. Многу сме мотивирани и возбудени. Ова е првиот трофеј годинава и сакаме да го освоиме, може да не турка понатаму во другите натпреварувања, -порача стоперот.
