На врвот на иновациите во секторот на електрични возила, "BMW" го привлече вниманието со својот револуционерен прототип со четири мотори, објави "InsideEVs". Овој модел, развиен во рамките на серијата М, користи по еден мотор за секое тркало, што овозможува прецизна распределба на моќноста и вртежниот момент. Според компанијата, одговорот на моторот се мери во милисекунди, што претставува перформанси „недостижни за конвенционалните погонски системи“.

"BMW" носи револуција во погонот на електричните автомобили

Овој проект е дел од пошироката стратегија на "BMW" за подобрување на перформансите во сегментот на мотоспортот преку целосно нова технологија за електричен погон. Директорот на "BMW M Motorspor", Францискус ван Мел, во промотивното видео истакна дека ова е „поместување на границите на она што е можно“. Видеоматеријалите ја прикажуваат „тајната локација за тестирање“ и развојот на централизирани контролни единици, кои се клучни за оптимизирање на работата на овие возила.

Додека "BMW "веќе има "EV" модели кои нудат опсег до 511 километри, развојот на прототип со четири мотори го најавува следниот чекор во оваа еволуција. Компанијата засега не открива премногу детали, но промотивната содржина ја навести можноста за сериски модел "М3" со оваа технологија до 2027 или 2028 година.

Конкуренција и глобални трендови

Дизајните со повеќе мотори не се ексклузивни за "BMW". Кинеската "GAC International" работи на сличен концепт, елиминирајќи ги погонската група и менувачот со интегрирање на моторот во тркалата. Ваквите иновации доаѓаат во време кога продажбата на електрични возила достигнува рекордно ниво. Според извештајот на "Cox Automotive", продажбата на EV модели во САД се зголемила за 11% во третиот квартал од 2024 година во споредба со истиот период минатата година, достигнувајќи 346.309 продадени единици.

Сепак, секторот не е без предизвици. Претходно оваа година "Ford" најави намалување на производството на електрични возила поради претпочитање на хибриди, економски несигурности и зголемени каматни стапки. Сепак, оптимистичките податоци од октомври укажуваат на континуиран раст на пазарот.

Важноста на "EV" технологијата за иднината

Електричните возила се сметаат за клучни за намалување на емисиите на стакленички гасови. Во САД, префрлањето на "EV" модели е поддржано со даночни кредити до 7.500 американски долари, како и годишни заштеди на гориво и одржување до 1.500 американски долари.

"BMW" преку својот иновативен прототип испраќа силна порака за подготвеноста да ги редефинира стандардите во индустријата. „Ќе испорачаме перформанси, квалитет и карактеристики кои денес никој не може ни да ги замисли“, изјави Карстен Волф, директор за развој на возила на компанијата.

Останува да се види како овие иновации ќе се вклопат во пошироката слика на индустријата за електрични возила, но јасно е дека BMW ги поставува темелите за возбудлива иднина во автомобилизмот, пренесува "TheCoolDown".