Она што требаше да биде комеморативен собир за жртвите од трагичните настани во Нови Сад, стана политички протест, искористен од дел од опозицијата за да ги промовира своите барања под маската на „одговорност за жртвите.“
Додека врвот на државата, вклучително и претседателот Александар Вучиќ, јасно стави до знаење дека сите одговорни лица ќе сносат и кривична, и морална, и политичка одговорност, дел од опозицијата го искористи собирот на граѓаните за свои политички цели.
Во првите редови на протестот беа претставници на опозициските партии, а собирот беше обележан со насилни сцени кои беа осудени од јавноста. Претседателката на Националното собрание, Ана Брнабиќ, го осуди уништувањето на јавната и приватната сопственост, како и употребата на државните симболи во несоодветен контекст, нагласувајќи дека ваквите акции нема да останат без санкции.
„Ја осудувам секоја постапка што ја видовме, од вандализам на зградата на градската управа во Нови Сад до непочитувањето на јавниот простор со фекалии. Институциите треба да ја завршат својата работа и да се утврди одговорноста, но насилството е неприфатливо и ќе биде санкционирано. Србија има институции, и тие ќе го задржат редот и правдата,“ изјави Брнабиќ.
Таа истакна дека е од клучно значење институциите да функционираат без надворешен притисок и да утврдат што точно се случило на железничката станица во Нови Сад, со цел одговорноста да биде соодветно распределена.
„Сите одговорни и виновни ќе одговорат за своите постапки. Никој нема да биде заштитен. Србија ќе остане стабилна држава,“ додаде таа.
Настаните во Нови Сад поттикнаа прашања за моралната одговорност и дали политичката манипулација на јавните трагедии е прифатлива.
