Австралискиот музичар Ник Кејв е најпознат по соработката со групата „The Bad Seeds“, а неговите хитови како „O Children“ и „Into My Arms“ се слушани десетици милиони пати на сите платформи.
Иако доживеа огромен светски успех, неговиот живот го одбележаа и трагедии...
Во интервју за „Australian Story“, славниот пејач рече дека од човек „воодушевен од сопствената генијалност“ дошол до тоа да се чувствува „срамно самозадоволно“ откако ги загубил двата сина во последните 10 години.
Неговиот син Артур почина во 2015 година кога имал само 15 години. Артур првпат пробал ЛСД, а потоа трагично паднал од карпа висока 20 метри во близина на неговиот дом во Брајтон. Тогаш во неговото тело пронашле траги од марихуана, а истрагата открила дека Артур бил целосно дезориентиран во моментите пред смртта.
Пред две години Кејв го загуби и вториот син Џетро, кој почина на 31-годишна возраст. Џетро се борел со шизофренија и зависност од дрога. Починал два дена по излегувањето од затвор каде одлежувал казна за физички напад на сопствената мајка, а бил пронајден во мотел во Мелбурн.
Ник сега признал дека повеќе не ја цени уметноста над сè, како што тоа го правел пред смртта на неговите два сина.
„Бев воодушевен од сопствената генијалност. Сега гледам колку е глупав тој срамен вид на самозадоволство“, рекол тој.
Музичарот раскажал како уметноста, поточно музиката, секогаш му била на прво место, но тоа целосно се променило откако починал неговиот 15-годишен син.
„За мене повеќе не важи идејата дека уметноста побива сè“, вели тој, додавајќи дека „има работи кои му се многу поважни од концептот на уметник“.
Музичарот ретко зборува за трагедијата што му се случила во животот, а ни овојпат не му било лесно да зборува за тоа. Кејв едвај ги задржал своите емоции за време на интервјуто. Тој претходно за „Guardian“ изјави дека се чувствува виновен за смртта на неговите синови бидејќи, како што вели, „противприродно е да се закопа дете“.
„Мислам дека тоа е нешто што луѓето кои губат деца го чувствуваат без разлика на ситуацијата, само затоа што единственото нешто што треба да направите е да не дозволите вашите деца да умрат. Заборавете го тоа. Единственото нешто што треба да направите е да ги заштитите вашите деца“, рече тој тогаш.
Австралискиот музичар долги години се бореше со зависноста од хероин, а во 1988 година беше уапсен поради поседување хероин. Тој, исто така, рече дека се чувствува виновен затоа што дрогата на некој начин била причината за смртта на Артур.
„Видете, таквите работи се во нашата ДНК, тие се наследни. Не сакам да правам никакви претпоставки за Артур, кој беше само млад човек. Тој не беше зависник“, рече тој.
Музичарот зборувал и за тагата што ја чувствува и денес.
„Со текот на времето се апсорбираме или се преуредуваме себеси да станеме суштества на загуба како што старееме. Тоа е дел од нашата основна структура, од тоа кои сме ние како луѓе. Тоа не е трагичен елемент во нашите животи, туку продлабочувачки елемент кој носи неверојатно значење во нашите животи“, рече тој.
Неговата тага се намалила со текот на годините, иако сè уште постои, а помогнало и тоа што неговиот син Лука и неговата сопруга Саша го добија синот Роман. Кејв има уште еден син, Ерл, кој е близнак на Артур.
