Според вчерашното соопштение на „ESA“ на социјалната мрежа Х, сателитот требало да прелета над Италија кон западниот брег на Норвешка при неговото паѓање. Меѓутоа, во меѓувреме проценката на траекторијата е променета, па сателитот треба да лета малку источно од Хрватска, пренесува „Index.hr“.

„Постои добра (и веројатно последна) шанса да се види „ERS-2“ од централна Европа вечерва околу 18:30 часот по средноевропско време. Каде и кога ќе биде видлив сателитот зависи од вашата локација и облаците“, соопшти вчера „ESA“.

Според страницата која ги следи сателитите, ќе помине над Хрватска

Но, сајтот „N2YO.com“, кој го следи минувањето на различни сателити на небото, денеска ја даде својата оценка според која „ERS-2“ ќе помине токму над Хрватска и централна Европа кон Шведска и Норвешка. Според таа страница, „ERS-2“ треба да прелета над Хрватска околу 17:55 часот.

Што значи ова за астрономите и ентузијастите од Хрватска?

Астрономот аматер, раководител на Астрономското друштво „Бескрај“ од Загреб, Борис Штромар, вели дека претходните искуства со метеорите покажуваат дека согорувањето на делови од сателитот треба да биде видливо од Хрватска, дури и ако неговиот пат оди малку на исток или запад.

„Имаше и порано случаи кога некои метеори паднаа над Италија, но можевме да ги видиме од Хрватска и обратно – имаше метеори кои италијанските астрономи можеа да ги видат иако паднаа над Хрватска. Значи, ако имате двоглед или камера, подгответе се за спектакл“, изјави Стромар.

„Како што се приближува моментот на согорување во атмосферата, така и траекторијата малку се менува бидејќи на сателитот влијае триењето на атмосферата, така што точниот момент и местото на согорување всушност не се познати со голема сигурност. Сигурно треба да следите нови информации, а ентузијастите треба да дежураат. Ако имате среќа, можеби ќе можете да го снимите моментот на експлозија и горење над Хрватска. Поверојатно е дека ќе биде некаде над океанот, но никогаш не се знае“, изјавил хрватскиот астроном.

Што е ERS-2?

Европскиот сателит за далечинско набљудување 2 (ERS-2) на Европската вселенска агенција (ESA), лансиран на 21 април 1995 година, беше еден од најсофистицираните сателити за набљудување на Земјата развиен и лансиран од Европа. Заедно со својот речиси идентичен претходник, ERS-1, собра вредни податоци за копнените површини, океаните и поларните капи на Земјата. Тој одигра важна улога во следењето на природните катастрофи како што се тешките поплави и земјотресите во оддалечените области.

Во 2011 година, по 16 години успешно работење, „ESA“ одлучи да ја прекине мисијата ЕРС-2 и да го деорбитира сателитот. Беа спроведени серија од 66 деорбитни маневри, користејќи го преостанатото гориво на сателитот и намалување на неговата просечна висина од 785 km на приближно 573 km. Овој маневар значително го забрза неговото орбитално распаѓање и го намали ризикот од судир со други сателити или вселенски отпад. Сите инструменти и електронски системи во него беа деактивирани и внатрешните батерии беа испразнети за да се намали фрагментацијата при повторното влегување.

Како што се намалува висината на орбитата на „ERS-2“, тој повторно ќе влезе во атмосферата на Земјата кога ќе достигне висина од приближно 80 km. Повеќето од неговите делови ќе изгорат при повторното влегување, а повеќето од оние што не изгорат ќе паднат во океанот.