Сидни Свини во неделата се појави на доделувањето на „People's Choice Awards“ во Лос Анџелес. Ѕвездата на „Madame Web“ носела фустан со потпис на модниот бренд „Monot“ со длабоко деколте во една од најмодерните нијанси оваа сезона – црвена.
Изгледот на Сидни бил многу класичен, но ефектен, и потсетувал на стариот Холивуд и нешто што би го носела и самата Мерилин Монро. Огненоцрвениот фустан се карактеризирал со сирена крој и длабоко деколте, а Сидни го надополнила со едноставни обетки и прстени од бело злато и дијаманти од „De Beers“.
Актерката ја облекла нејзината долгогодишна стилистка Моли Диксон, чии други клиенти вклучуваат ѕвезди како Луси Хејл, Аријана Гринблат и Лана Дел Реј.
Свини со фустанот вклопила и секси фризура со многу волумен, додека нејзината шминка вклучувала темен ајлајнер и мат усни во беж нијанса.
Црвените нијанси се најголемиот тренд оваа година откако ги освоија модните писти на „Valentino“, „Carolina Herrera“ и „Emilia Wickstead“ за време на есенската сезона 2023 година. Ѕвездите како Селена Гомез, Флоренс Пју и Кајли Џенер го донесоа овој тренд во 2024 година, носејќи ја црвената боја на настани како што се Златните глобуси и Неделата на висока мода во Париз.
Кон крајот на минатата година, Свини ја прошири својата линија на облека со „Ford“, лансирајќи втора колекција со автомобилската компанија. Колекцијата вклучува пет парчиња инспирирани од синиот Мустанг на Свини од 1965 година, кој таа со љубов го нарекува „Бритни“.
„People's Choice Awards“, кои собираат гласови од фановите и јавноста, настанаа во 1975 година. 49-та годишна церемонија се одржа на 18-ти февруари во Баркер Хангар во Лос Анџелес.
