(Видео) Погледнете како роботакси возилата го блокирале сообраќајот во Остин

На тапет повторно е „Cruise“, и тоа неговата постава од Остин во Тексас. На социјалните мрежи се шират снимки од роботакси возила насобрани на улица каде го блокираат одвивањето на сообраќајот. Самостојните возила стојат во колона, неколку од нив се застанати во спротивна насока, а дел од нив ги имаат пуштено сите четири трепкачи.

Ова не е прв случај возилата на „Cruise“ да предизвикаат дистописки застој. Минатиот месец десетина роботаксија го блокирале сообраќајот во Сан Франциско, а истото се случило и минатиот јули. Застојот се обиделе да го средат вработените во „Cruise“, но очигледно не многу успешно.

Како што дознава „The Drive“, портпаролот како можна причина за застојот го наведува густиот сообраќај на пешаци и возила на кои очигледно системот на управување на возилата на „Cruise“ не им е дораснат.

„Сообраќајот од пешаци и возила на улиците беше густ“, рекол портпаролот. „Нашите автомобили се дизајнирани пред сè да дадат предност на безбедноста, а тоа вклучува и внимание во близина на пешаци. „Cruise“ континуирано ја надгледува својата флота, а на метежи сме предупредени во недела наутро. Се извинуваме за сите проблеми“.

Во секој случај, има се повеќе граѓани кои се незадоволни од роботакси возилата и не ги прифаќаат оправдувањата од „Cruise“.