Оваа агенција соопшти дека примероците од урина земени од Европејци во неколку земји покажале дека изложеноста на БПА останува „значително над прифатливото ниво на здравствена безбедност“ и претставува потенцијален ризик за милиони луѓе.

Се користи во пластични и метални садови, шишиња за вода...

БПА, која се користи во пластични и метални садови за храна, шишиња за повеќекратна употреба и цевки за вода за пиење, дури и во мали дози може да го ослабне имунолошкиот систем, наведува агенцијата.

Хемикалијата БПА кај луѓето може да предизвика низа здравствени проблеми како неплодност и алергиски реакции на кожата.

Бисфенолот А и уште два бисфеноли кои се користат како замена за БПА се измерени во урината на 2756 лица од 11 земји: Хрватска, Данска, Чешка, Франција, Финска, Германија, Исланд, Луксембург, Полска, Португалија и Швајцарија.

„Многу пораспространет здравствен ризик отколку што се мислеше“

„Нивото на пречекорување варира помеѓу 71 и 100 отсто“, соопшти ЕЕА со седиште во Копенхаген за 11-те земји.

„Благодарение на револуционерниот истражувачки проект на ЕУ за биомониторинг на луѓето, можеме да видиме дека бисфенолот А претставува многу пораспространет ризик по нашето здравје отколку што претходно се мислеше“, изјави извршната директорка на ЕЕА, Лина Ила-Мононен.

„Мораме сериозно да ги сфатиме резултатите од ова истражување и да преземеме повеќе акции на ниво на ЕУ за да ја ограничиме изложеноста на хемикалиите кои претставуваат ризик по здравјето на Европејците“, додала таа.

БПА со години е забранет во пластичните шишиња и амбалажи кои содржат храна за бебиња и мали деца во ЕУ. Во февруари 2018 година блокот исто така воведе построги ограничувања за БПА во сите материјали кои се во контакт со храна.