“Имам две мали деца и кога ги добивме, ги капевме секој ден пред спиење. Полневме када со топла вода и прво се капе едното дете. Па другото. А потоа мојата сопруга, па јас.
Сфатив две работи: сметките за вода беа огромни и колку оваа навика се разликува од онаа која ја практикувале моите родители.
Се сеќавам на моето детство кое драстично се разликува од она кое го имаат моите деца. Синот и ќерката денес си играат во некои игротеки, ги поминуваат деновите пред телевизор гледајќи цртани филмови или играјќи игри. Често го поминуваат целиот ден без да се испотат, но сопругата повторно ги капе на крајот од денот и тоа во када полна со вода и сапуница.
Моите родители практикуваа една работа: децата и сите домашни се капат еднаш неделно и тоа исклучиво во недела. Во понеделник на училиште ве проверуваа дали сте ги исекле ноктите, дали сте ја скратиле косата, измиле ушите... Останатите денови не се капевме. Мојот брат и јас бевме немирни деца и деновите ги поминувавме во двор или со другарите на фудбалскиот терен. Дома доаѓавме валкани, повалкани не можевме да бидеме. Нашата мајка нè испраќаше во купатило да ги измиеме рацете, нозете и интимните делови и тоа беше сè.
А потоа пораснав и започнав да се туширам секој ден. Еднаш добив осип на кожата и отидов на дерматолог, по што беше воочено дека имам оштетување на кожата од прекумерно користење на сапун. Добив специјална крема која сега морам да ја користам до крајот на својот живот.
Според дерматологот Џош Зеинчер, родителите не смеат да го капат детето секој ден. Неговата препорака е капење на секои три дена што може дури и да спречи развој на егзема. Американската академија на педијатри советува децата да не се капат постојано со сапун – понекогаш е доволно да го искапете детето само со топла вода. Лекарите сметаат дека прекумерното користење на сапун го уништува природниот себум на кожата и ги уништува бактериите корисни за луѓето.
Навиката на секојдневно туширање е последица на неоправдано наметната културна норма, а не објективно корисна процедура за здравје. Треба често да ги миеме рацете и тоа од оправдани причини. Но, нашата кожа има природен механизам на чистење, а пазувите, стапалата и гениталиите сепак мијте ги секој ден.
Во 1992 година запознав интересно племе од Амазон кое имаше неверојатно здрава и свиленкава коса, и покрај фактот што никогаш во животот не виделе шампон. Сфатив дека постојана употреба на шампон доведува до испирање на заштитниот слој на маснотии на косата, па косата се суши и пука. Кога се вратив од Бразил, престанав постојано да ја мијам косата со шампон – резултатот е здрава коса без првут.
Ова се сега моите навики кои не планирам да ги променам во скоро време”, пишува Доначад Мекарти за The Guardian.
