Тешко дека постои некој што не уживал во незаборавните епизоди на култната серија „'Allo 'Allo!“ и не се смеел на авантурите на шармантниот сопственик на француското кафуле.
Актерот Горден Кеј се прослави со улогата на Рене Артоа, но зад комичниот лик и огромната светска слава се криела исклучително тешка, необична и на моменти трагична животна приказна. Иако со децении развеселувал милиони гледачи ширум светот, во приватниот живот се борел со сопствените демони, тешката повреда и нарушеното здравје, а неговите најблиски на крајот ја опишале неговата смрт како вистински благослов.

Роден е во Хадерсфилд во 1941 година, како единствено дете на Харолд и Грејс Кеј, која го родила на 42-годишна возраст. Неговиот татко за време на Втората светска војна работел во службата за противвоздушна одбрана, а подоцна се вработил во фабрика за трактори. Како момче играл рагби, додека по завршувањето на школувањето морал напорно да се бори за секое пени, работејќи тешки работи во текстилни фабрики, фабрика за трактори и винарија.
Сепак, во него постојано тлеела голема љубов кон радиото и глумата, па како млад работел во болничкото радио во родниот град, каде што во 1963 година ги интервјуирал членовите на групата „The Beatles“ и Кен Дод. Пресвртницата се случила кога добил улога во една радиодрама во режија на Алан Ајкборн, кој го советувал да оди на аудиција во театарот „Octagon“ во Болтон. Го добил ангажманот и набргу почнал да настапува во познати претстави како „Luther“, „The Imaginary Invalid“, „Oedipus“, „Cyclops“ и „The Return“.

Интересно е и тоа што необичното пишување на неговото име, Горден, настанало поради печатна грешка во Британското актерско здружение, но тоа му се допаднало, па одлучил да го задржи. Првата телевизиска улога ја добил во 1968 година во серијата „Champion House“, а во 1969 година се појавил во популарната сапуница „Coronation Street“. Следувале бројни споредни улоги со кои го градел угледот на сигурен актер, додека омилените серии и телевизијата постепено му ги отворале вратите кон успехот.
Едно сценарио му го променило животот
Големиот пресврт во неговата кариера и живот се случил во 1982 година, кога сценаристот и продуцент Дејвид Крофт му испратил сценарио за пилот-епизодата на нова хумористична серија, надевајќи се дека ќе ја прифати главната улога. Станувало збор за ликот на Рене Артоа, сопственик на кафуле во окупирана Франција, кој се обидува да ја преживее војната додека го крие Движењето на отпорот, соработува со Германците и се вплеткува во бројни љубовни компликации.

Серијата „'Allo 'Allo!“ почнала да се емитува во 1984 година и траела сè до 1992 година, а Горден Кеј бил единствениот актер што глумел во сите 85 епизоди. Ликот на Рене станал толку популарен што Кеј го играл и во театарската верзија дури 1.200 пати. На својата позната улога ѝ се врати и во 2007 година, во специјалната епизода „The Return of 'Allo 'Allo!“, како и за време на турнејата во Австралија.
„Срамежлив, полничок геј“
Зад насмеаното лице и успешната кариера се криел човек чиј приватен живот бил исполнет со големи пресврти. Во својата автобиографија „Rene & Me“, објавена во 1989 година, отворено пишувал за тоа дека бил исклучително срамежлив бидејќи во младоста имал проблеми со прекумерната тежина. Уште како тинејџер сфатил дека е хомосексуалец, но долго време бегал од вистината за себе, па на 22-годишна возраст дури и ѝ предложил брак на една жена, пред да сфати дека тоа не е вистинскиот пат за него.

Неговата колешка Вики Мишел открила дека му било многу непријатно за време на снимањето на љубовните сцени. Вики Мишел раскажала дека тој бил геј во време кога не можело јавно да се зборува за тоа и гордо да се изразува сопствениот идентитет. Затоа, кога таа го фаќала во сцените, тој морал навистина да се потруди и да го истурка задникот наназад за телото што повеќе да го оддалечи од неа. Актерот јавно ја открил својата сексуална ориентација во 1989 година, на 48-годишна возраст, и порачал дека таков се родил и дека никогаш не се преправал дека е нешто друго.
Неговиот живот го одбележала и тешка трагедија во јануари 1990 година, кога за време на бура во Лондон доживеал страшна сообраќајна несреќа во која парче дрвена табла поминало низ ветробранското стакло и му нанело тешки повреди на главата. Итно бил опериран, а за да му помогнат да го врати помнењето, неговиот агент и коавтор на серијата Џереми Лојд му пуштале снимки од „'Allo 'Allo!“ додека лежел во болница.

За време на закрепнувањето доживеал уште една непријатност кога двајца новинари влегле во неговата болничка соба, го фотографирале и го интервјуирале без дозвола, што довело до познатиот судски спор „Кеј против Робертсон“ за правото на приватност.
Последните години од животот ги поминал повлечено и далеку од јавноста, бидејќи нарушеното здравје му донело тешка дијагноза на деменција. Последните две години ги поминал во дом за стари лица во Кнарсборо, каде што ретко имал посетители. Рејмонд Шатлворт, сопругот на неговата роднина Шила, изјавил дека Горден кон крајот веќе не можел да се препознае ниту себеси, па неговата смрт на 76-годишна возраст ја сметал за благослов, бидејќи немало никакви шанси за закрепнување.

Починал на 23 јануари 2017 година, а на погребот во Хадерсфилд од него се простиле колешките Вики Мишел, Сју Хоџ и Ким Хартман, додека семејството и публиката му оддале последна почит на големиот актер со стиховите на неофицијалната химна на Јоркшир.












