Кога ќе ни снема идеи за вечера, инспирацијата понекогаш е најдобро да ја побараме кај докажаните готвачи. Еден од рецептите што им се допаѓа и на возрасните и на децата е пастата со брокула и тестенини во форма на машнички, според рецептот на познатата американска готвачка Ина Гартен, пишува „Simply Recipes“.

Брокулата во ова јадење има подеднакво важна улога како и тестенините, а свежиот лимон го ублажува богатиот вкус на путерот. Јадењето е готово за околу 25 минути и е доволно за шест до осум лица. Може да се послужи самостојно или со пилешко месо, риба или друг извор на протеини.

Потребни состојки:

• 225 гр. тестенини во форма на машнички
• 4 главици брокула
• 2 лажици путер
• 2 лажици маслиново масло
• 1 лажичка ситно сечкан лук
• кора од еден лимон
• 1 лажица свежо исцеден сок од лимон
• 1/2 лажичка свежо мелен црн бибер
• сол
• рендан пармезан по желба

Подготовка:

Во големо тенџере зовријте посолена вода. Додајте ја брокулата и варете ја три минути, а потоа извадете ја со лажица и префрлете ја во поголем сад.

Во истата вода сварете ги тестенините според упатството на пакувањето, околу 12 минути. Добро исцедете ги и додајте ги во садот со брокулата.

Додека се варат тестенините, во помала тава загрејте ги путерот и маслиновото масло. Додајте ги лукот и кората од лимон и пржете ги една минута на средно ниска температура.

Тргнете ја тавата од оган, додајте две лажички сол, бибер и сок од лимон. Прелијте ги тестенините и брокулата со сосот и добро промешајте.

По потреба додајте уште сол, наросете пармезан и послужете веднаш.