Платформата за стриминг на музика „Spotify“ започна нов бран проверки на корисниците на претплатата „Family“, со цел да го спречи споделувањето пакети меѓу пријатели кои не живеат на иста адреса. Иако семејниот пакет уште од 2014 година е наменет исклучиво за членови на исто домаќинство, многу претплатници со години ги делат трошоците со роднини и познајници.
Компанијата сега воведува значително построг механизам за проверка, кој бара физичко присуство на членовите на групата.
Според новиот систем, од одредени корисници на пакетот „Family“ се бара да потврдат каде живеат така што со својот телефон ќе скенираат QR-код што се генерира на уредот на носителот на претплатата.
За проверката да биде успешна, двете лица мора да бидат на исто место. Кодот автоматски се менува на секои неколку секунди, што целосно ја спречува можноста некој едноставно да ви испрати слика од екранот преку порака од друг стан или град.
Рок од седум дена и забрана од 12 месеци
„Spotify“ остава рок од седум дена од приемот на известувањето за да се скенира кодот. Секој што ќе го пропушти овој рок или нема да успее да ја помине проверката ќе се соочи со строга казна: го губи правото да се приклучи на кој било пакет „Family“ или „Duo“ во следните 12 месеци. Додека трае забраната, единствената опција за слушање музика без реклами ќе биде плаќање на поскапата, индивидуална претплата „Premium“.
Ваквиот потег повторно ги отвора старите дилеми околу дефиницијата за семејство. Кога „Spotify“ во 2018 година експериментираше со проверка на локацијата преку „GPS“, наиде на голем отпор кај корисниците, бидејќи многу семејства не живеат постојано под ист покрив. Студентите во студентски домови, членовите на семејството кои често патуваат поради работа или разделените родители ќе се соочат со истиот проблем во зададениот рок од една недела, без оглед на тоа што навистина припаѓаат на исто семејство.
