Полициски час во повеќе градови: снимки од Франција по масовните немири

Француските власти воведоа ноќен полициски час во делови од Париз и во повеќе други градови, по викендот исполнет со масовни протести, насилство, пожари и грабежи.

Во делови од центарот на Париз, вклучително и плоштадот Република и трговскиот кварт Ле Ал, полицискиот час важи од 23 до 6 часот. Ограничувања се воведени и во Марсеј, Бордо, Ница, Лион и Лил.

Протестите почнаа минатиот месец со барања на учениците и студентите за подобри услови во образованието, а подоцна прераснаа во масовни демонстрации против високите трошоци за живот, поскапувањето на горивата и влошувањето на јавните услуги.

Во текот на викендот на улиците излегоа околу 550.000 демонстранти. Во повеќе градови избувнаа насилни судири, беа запалени автомобили и згради, а бројни продавници беа ограбени. Според информациите на француските власти, уапсени се над 2.500 лица, а повредени се околу 1.000 полицајци.

Министерот за внатрешни работи Лоран Нуњез призна дека полицијата во одредени градови ја изгубила контролата. Тој понудил оставка, но претседателот Емануел Макрон одбил да ја прифати.

Премиерот Себастијан Лекорну не ја исклучи можноста за прогласување вонредна состојба и најави финансиска помош за погодените подрачја.

Според француските стопански комори, повеќе од 2.000 продавници и компании биле директно погодени од насилството, а материјалната штета се проценува на стотици милиони евра.

Во градот Лимож, во подметнат пожар тешко е оштетена градската куќа од 19 век, при што се урнале покривот и кулата со часовник.

Поради немирите, САД, Кина и Германија издадоа предупредувања до своите државјани да ги избегнуваат подрачјата зафатени од протестите.