Станува збор за Барбера Х. Торнхил, идната специјална амбасадорка за следење и борба против трговијата со луѓе, чиј портрет предизвика бројни коментари и прашања.

Торнхил за новата функција ја претстави помошникот на државниот секретар Рајли Барнс, кој во објава на платформата X ѝ посака добредојде во Стејт департментот. „Амбасадорке Торнхил, добредојдовте во тимот. Горд сум што ни се придружи толку посветена лидерка на функцијата специјална амбасадорка за следење и борба против трговијата со луѓе“, напиша Барнс.

Шеги на X

Објавата многу брзо тргна во друга насока, бидејќи наместо за нејзиното именување, корисниците почнаа да дискутираат за официјалниот портрет. Многумина се запрашаа дали фотографијата воопшто е вистинска, додека други претпоставуваа дека станува збор за лошо обработена фотографија.

„Дали ова е реално?“, праша адвокатот Роберт Барнс на платформата X. „Ова е вистинска слика?“, се запраша и новинарот Алан Меклауд. Научничката од Флорида, Ребека Џонс, напиша: „Како суптилно да го прашам ова? Дали жената доживеала некаква несреќа или фотографијата едноставно е лошо обработена?“.

Тим Милер од порталот „The Bulwark“ одлучи да ја искоментира фотографијата со доза сарказам: „Важно е на оваа функција да има некој што секогаш ќе ги држи очите ширум отворени за потенцијалните трговци со луѓе“.

Независниот новинар Џејмс Ли објави само: „Браќа...“, придружено со три емотикони со череп. Демократката Али Самарко одговори со четири прашалници, додека нејзиниот колега Адам Пархоменко сподели графика со натписот „Straight Outta Mar-A-Lago“.

Канадскиот водител Дин Бландел не избираше зборови. „Што, по ѓаволите, ѝ е со лицето? Изгледа како човечки Пикасо“, објави тој.

Фотографијата генерирана со вештачка интелигенција насмеа многумина

Некои си поиграа со вештачката интелигенција, па направија паралела со милијардерката Сузан Дел, која соработува со Трамп и која, исто така, неодамна го привлече вниманието со својот изглед.