Кога Кара Браун и нејзиниот сопруг купиле куќа изградена во педесеттите години на минатиот век, во подрумот ги пречекала глетка што ретко се гледа – вистински внатрешен базен. Она што на прв поглед изгледало како луксузен и необичен додаток на домот, набрзо се претворило во сериозен проблем. Базенот создавал толку многу влага што ни индустрискиот одвлажнувач на воздух не успевал да ја држи ситуацијата под контрола, па парот се загрижил поради појавата на мувла и потенцијалното оштетување на конструкцијата на куќата, пренесува магазинот „People“.
Покрај проблемот со влагата, непокриениот базен во подрумот претставувал и голем безбедносен ризик за нивното мало дете. Поради тоа донеле прилично радикална одлука – ја испуштиле целата вода и над базенот поставиле нов под. Сепак, не го уништиле базенот ниту го затрупале со бетон, оставајќи можност некои идни сопственици, или тие самите еден ден, повторно да го откријат и да го вратат во функција.
Архитектонско наследство инспирирано од Френк Лојд Рајт
Парот ја купил оваа модернистичка куќа во американската сојузна држава Њујорк откако со години се користела за краткорочно изнајмување преку платформата „Airbnb“. Изградена е во 1956 година според проект на архитектот Џулијан Некер, кој црпел инспирација од делата на легендарниот Френк Лојд Рајт, еден од најпознатите американски архитекти на 20 век.
Самата изработка на конструкцијата и покривањето на базенот траеле само еден ден. Новиот простор засега нема конечна намена, па семејството во постудените месеци го користи пред сè како игралиште на кое нивното дете може непречено да трча. „Долгорочно гледано, сè уште се обидуваме да одлучиме што би било најдобро да направиме со тој простор“, признала Кара.
@kbreezin_ before you come w/ pitchforks - we decked over it instead of filling so we have the option to revive Her✨ she’s not for us in this era - we have a small child + we want to stabilize the moisture issues in the home. #midcenturymodern #indoorpool #summerhouse #midcenturymodernhome ♬ im getting a divorce mikayla nickelodeon - whoispenelopewong
Виралната снимка разгорела дебати на социјалните мрежи
Кара го документира целиот процес на обнова на куќата на „TikTok“, каде што редовно покажува како се обидуваат да му го вратат на домот неговиот изворен модернистички карактер. Видеото во кое покажала што направиле со базенот во подрумот брзо станало вирално и собрало повеќе од 5,4 милиони прегледи.
Многу следбеници го пофалиле компромисот што го направиле, додека други остро ја критикувале одлуката, поставувајќи го прашањето зошто воопшто купиле куќа со базен ако не планирале да го користат. Кара објаснува дека не станувало збор за естетиката, туку за функционалноста и зачувувањето на објектот: „Базенот не беше само детаљ што не ни се допаѓаше. Влагата што ја создаваше ја загрозуваше целата куќа“.
Обнова во духот на модернизмот од 1950-тите
Откако привремено го решиле прашањето со базенот, парот се посветил на остатокот од реновирањето. Нивната цел е целосно да ја обноват куќата и да ѝ го вратат оригиналниот карактер со архитектонски детали типични за модернизмот од средината на 20 век. Голем дел од работата ја извршуваат сами, со помош од семејството.
„Мојот сопруг и свекор ми се многу вешти, па успешните зафати ги направија лични и приспособени на нас, но истовремено и верни на самата куќа. Се вљубивме во архитектурата, имотот и уникатната историја на овој дом. Базенот дефинитивно беше еден од најнеочекуваните делови од таа приказна и, иако моментално не го користиме, сакавме да го зачуваме наместо засекогаш да го уништиме“, заклучува Кара.
