Популарниот јутјубер @zackdfilms се обиде да им ги долови на луѓето размерите на овој скриен свет, користејќи симулација која го прикажува патот од површината на океанот до застрашувачки длабочини од речиси 11 километри.

Најдлабоката позната точка

Длабочините се разликуваат од еден океан до друг, но кога ќе се обединат нивните просечни вредности, се доаѓа до шокантна бројка – 3.682 метри.

Тихиот Океан има најголема просечна длабочина, која изнесува 4.280 метри. На второто место е Индискиот Океан (3.741), додека трет е Атлантскиот Океан (3.646).

Релативно најплитки се Јужниот Океан, чија просечна длабочина изнесува 3.270 метри, и Арктичкиот Океан, со просек од 1.204 метри.

Овие бројки, меѓутоа, не ја откриваат целата приказна, пренесува „LadBible“.

Најдлабоката позната точка на светскиот океан се наоѓа во Маријанскиот Ров, во Тихиот Океан. Позната е како Челенџеров Понор, со проценета длабочина од околу 10.911 метри.

За да ја долови големината на овој подводен понор, јутјуберот користел компјутерска симулација, а како „мерка“ – највисоката градба во светот, Бурџ Калифа.

Дури кога би „наредиле“ 13 од споменатите облакодери, еден врз друг, би ја достигнале приближната длабочина на Челенџеровиот Понор!

Изненадувачки разновиден свет

Спуштањето до вакви длабочини претставува исклучително сложен потфат, кој подразбира специјализирана опрема и подморници способни да издржат огромен притисок.

Меѓу оние што со свои очи го виделе овој понор е Џејмс Камерон, режисерот на култниот филм „Титаник“.

Значи, океанското дно не е само непрегледна површина која постепено се спушта кон сè поголеми длабочини. Неговиот релјеф го сочинуваат длабоки котлини, пространи рамнини, кањони и огромни планински венци.

Иако длабочините на океанот се многу негостољубиви за луѓето, во нив живее изненадувачки разновиден свет. Многу суштества се приспособиле на услови кои за човекот би биле смртоносни, вклучувајќи ги притисокот, ниските температури и речиси целосното отсуство на светлина.

Интересно е што дури и во најдлабоките океански ровови се пронајдени бактерии кои успеваат да опстанат во екстремни услови. Научниците забележале и риби кои живеат на исклучителни длабочини.

Меѓу нив се наведува видот „Abyssobrotula galatheae“, чиј претставник е пронајден во Порториканскиот Ров на длабочина од дури 8.372 метри.