Ѓоковиќ настапи во Пекинг по 11 години и го подобри својот скор на 34 победи без пораз, што е најдобар резултат на еден тенисер или тенисерка на еден турнир, но не е тоа единствениот начин на кој испиша историја – има и други.

Со освојувањето на титулата во Пекинг, Ѓоковиќ ја продолжи низата и веќе 21 сезона по ред освојува најмалку еден трофеј годишно. Денес има 102 титули (трет најдобар резултат на сите времиња), а она што е интересно е што сè започна уште во далечната 2006 година, кога го подигна првиот трофеј во холандскиот Амерсфорт.

Како Ѓоковиќ ја освои титулата во Амерсфорт?

Новак Ѓоковиќ го подигна првиот трофеј во кариерата на 23 јули 2006 година во Амерсфорт. Во финалето го совлада Чилеанецот Николас Масу со 7:6 (7:5), 6:4, а интересно е и тоа што во првото коло на турнирот го победи својот сонародник Борис Пашански со 6:0, 6:3. Кога го освои последниот поен, Ноле клекна на земјената подлога и почна да слави, потоа се поздрави со Масу и доби честитки од него на мрежата. Чилеанецот денес може да се пофали дека бил првиот што ја почувствувал моќта на Ѓоковиќ.

Сето тоа внимателно го следеше неговата сопруга Јелена Ѓоковиќ, тогаш Ристиќ, која седеше на трибините веднаш до тренерот Маријан Вајда. Новак прослави со публиката на теренот, ѝ се поклони, а потоа истрча да ја бакне Јелена. Интересно е и тоа што како награда доби „ајпод“.

Пророчката изјава на Новак 

По оваа победа, Новак Ѓоковиќ за првпат влезе меѓу 30-те најдобри тенисери во светот, поточно се искачи од 36-то на 28-то место. Оттогаш не го напушти ова друштво. Сето тоа го постигна две години по дебито на големата сцена, бидејќи во септември 2004 година стана професионалец во Букурешт, па и неговиот говор во Амерсфорт звучеше речиси пророчки. Тој најдобро покажува колку Ѓоковиќ отсекогаш верувал во себе и гледал напред.

„Како сум? Не чувствувам ништо посебно “, рече Ѓоковиќ низ насмевка. „Ова ми е прва титула, среќен сум што успеав овде во Холандија, пред оваа прекрасна публика, и се надевам дека ова ќе биде првиот чекор во мојата кариера. И се надевам дека ќе освојам уште многу титули“.

Се разбира, публиката во Холандија го поздрави тоа со аплауз, несвесна дека пред неа настапувал тенисер чиј „првенец“ ќе се памети засекогаш, можеби дури и повеќе од некои други, поголеми титули.

Што постигна Ѓоковиќ од 2006 година?

Од првата до 102-та титула поминаа 20 години. Во меѓувреме, Ѓоковиќ освои уште 24 грендслем-трофеи (од кои десет на Австралија опен), потоа 40 мастерс-титули, злато на Олимписките игри и седум титули на Завршниот мастерс, по што е исто така рекордер...

Значи, токму како што и рече – освоил уште многу титули по онаа првата во Амерсфорт, а не му недостига многу ниту до апсолутниот рекорд на сите времиња. Роџер Федерер има 103 титули, а Џими Конорс 109 – и не е невозможно Ѓоковиќ да го симне и него од тронот.