Веќе минатата година пишувавме за Гинисовиот рекорд за најнискиот автомобил во светот, направен од „Panda“, а во тој текст го споменавме и најтесниот автомобил, изработен од истиот модел на „Fiat“. Тогаш тој сè уште не беше официјално внесен во книгата на необични рекорди, но тоа во меѓувреме се промени. Од „Guinness“ неодамна потврдија дека токму овој автомобил официјално ќе биде вклучен во книгата на рекорди за 2027 година, во категоријата најтесен автомобил во возна состојба во светот.

Тесен, потесен, најтесен

Италијанскиот автомеханичар Андреа Мараци успеал да го преработи класичниот модел „Fiat Panda“ од 1993 година во возило кое официјално е прогласено за најтесниот функционален автомобил во светот. Работата на овој несекојдневен проект се одвивала на семеен отпад за возила во местото Бањоло Кремаско, каде што автомобилот пристигнал во 2024 година. Наместо да биде уништена и преработена во секундарна суровина, старата „Panda“ послужила како основа за несекојдневен инженерски потфат.

Во процесот на преработка, Мараци ја намалил ширината на каросеријата на само 50,2 сантиметри – што му овозможува да го вози автомобилот со двата лакта испружени низ прозорците. Првата генерација на „Fiat Panda“ во својата оригинална форма имала димензии од 3,38 метри во должина и 1,46 метри во ширина, а нејзината примарна намена била полесно движење низ тесните италијански градски улици. И покрај тоа што уште во фабричкото издание станувало збор за исклучително компактен автомобил, италијанскиот механичар одлучил дополнително да го отстрани вишокот простор и да создаде уникатен примерок кој може да се протне речиси насекаде.

Процесот на изработка и преобликување траел околу една година, а возилото ја задржало својата препознатлива форма и покрај драстичното стеснување. По завршувањето на сите работи и проверката на функционалноста, „Guinness“ потврдил дека автомобилот ќе го вклучи меѓу своите светски рекорди.