Единствениот услов е да учествувате во истражувањето кое го проучува влијанието на животот на поголеми надморски височини врз човековиот организам.

Истражувачкиот центар „Eurac Research“ моментално бара здрави доброволци на возраст од 18 до 40 години кои би учествувале во проектот „MAHE“ (Moderate Altitude Healthy Exposure). Во текот на истражувањето учесниците ќе живеат на надморска височина помеѓу 2300 и 2500 метри, додека научниците ќе ги следат нивните физиолошки реакции и ќе анализираат како таквото опкружување влијае врз здравјето.

Зошто се спроведува ова истражување?

Иако ефектите од престојот на екстремно големи надморски височини се добро истражени, научниците истакнуваат дека многу помалку се знае за тоа како долготрајниот престој на умерени височини влијае врз организмот.

Според податоците на „Eurac Research“, околу 200 милиони луѓе ширум светот постојано живеат на надморски височини над 2000 метри. И покрај тоа, постојат релативно малку истражувања за тоа како таквите услови влијаат врз долгорочното здравје, метаболизмот, сонот, работата на срцето и крвните садови, како и врз општата состојба на организмот.

Во текот на студијата истражувачите ќе следат бројни показатели, вклучувајќи го крвниот притисок, нивото на кислород во крвта, метаболизмот, апетитот, квалитетот на сонот, активноста на нервниот систем и физичката издржливост. Целта е да се утврди дали животот на умерена надморска височина може да има здравствени придобивки или со себе носи одредени ризици.

Каде ќе престојуваат учесниците?

Доброволците ќе бидат сместени во планинарскиот дом „Rifugio Nino Corsi“, кој се наоѓа во Националниот парк Стелвио, едно од најубавите подрачја на италијанските Алпи.

Организаторите во текот на целото истражување ќе обезбедат сместување и сите оброци, додека секој учесник ќе добие и надомест од 400 евра за времето поминато во проектот. Програмата опфаќа почетни медицински тестирања, четиринеделен престој на планината и завршни здравствени прегледи.

Иако престојот во планините може да звучи како одмор, учесниците ќе мора да почитуваат одредени правила. Од нив се очекува да продолжат со својот вообичаен начин на живот, што значи дека можат да работат на далечина, да студираат или слободното време да го поминуваат во природа. Сепак, не смеат значително да го зголемуваат нивото на физичка активност ниту за време на истражувањето да одат на локации кои се наоѓаат на поинакви надморски височини.

Кој може да се пријави?

Право на пријавување имаат здрави мажи и жени на возраст од 18 до 40 години кои имаат нормална телесна тежина и вообичаено живеат на надморска височина под 1500 метри.

За оние кои ги сакаат планините и сакаат да придонесат кон научните истражувања, ова би можело да биде единствена можност еден месец да поминат на италијанските Алпи, со целосно покриени трошоци за престој и паричен надомест, додека учествуваат во проект кој би можел да донесе нови сознанија за влијанието на животот на умерени надморски височини врз човековото здравје.

Според податоците на „Eurac Research“, истражувањето моментално е пополнето и повеќе нема слободни места, но заинтересираните можат да испратат е-пошта на адресата mahe@eurac.edu за да бидат ставени на листата на чекање.

Во е-поштата, која треба да биде напишана на англиски јазик, потребно е да наведете дека сакате да учествувате во студијата и дека ги исполнувате условите за пријавување.