Наместо тоа, почесто се одлучуваат за итните амбуланти и бараат лекарска помош дури кога проблемот ќе стане неизбежен. Во продолжение дознајте зошто се разликуваат од постарите генерации и кои се предностите од долгорочниот однос со лекарот од примарната здравствена заштита.

Миленијалците поретко имаат матичен лекар

Истражувањата покажуваат дека пристапот кон здравствената заштита се разликува меѓу миленијалците и бејби-бумерите. Според истражувањето на „Employee Benefit Research Institute“ од 2019 година, 82 проценти од припадниците на постарата генерација имаат свој матичен лекар, додека кај миленијалците тој удел изнесува 65 проценти.

Разликата е видлива и во ставовите. Повеќе од половина од бејби-бумерите (51 процент) сметаат дека за секој здравствен проблем најпрво треба да му се обратат на својот лекар, додека истото го мислат само 32 проценти од миленијалците .

Од друга страна, секој петти миленијалец повеќе ѝ верува на сопствената проценка за здравствените тегоби отколку на мислењето на лекарот, додека кај бејби-бумерите такви се 14 проценти.

Зошто миленијалците почесто избираат итни амбуланти?

Помладите генерации често им даваат предност на брзината и практичноста. Истражувањето на „PNC Healthcare“ од 2015 година покажало дека 25 проценти од миленијалците попрво посетувале итни амбуланти или центри за итна медицинска помош, во споредба со 14 проценти од постарите лица.

Дополнително, истражување објавено во 2025 година во списанието „Frontiers in Public Health“ покажало дека дури 51 процент од миленијалците го посетуваат својот матичен лекар поретко од еднаш годишно.

Некои истражувања, исто така, укажуваат дека токму миленијалците се генерацијата која најверојатно ќе премолчи одредени информации пред својот лекар, што може да го отежне поставувањето точна дијагноза и навременото лекување.

Професорот по здравствена политика на Медицинскиот факултет при Универзитетот „Harvard“, д-р Атив Мехротра, истакнува дека ваквите навики не се единствени само за миленијалците, туку одразуваат поширока промена во очекувањата на пациентите.

Долгото чекање е една од причините

Една од причините поради кои помладите лица се одлучуваат за итните амбуланти се долгите рокови за чекање термин кај лекар.

Според извештајот на „AMN Healthcare“ од 2025 година, просечното време на чекање за термин кај лекар во поголемите американски градови изнесувало 31 ден. Наспроти тоа, корисниците на интернет-форуми наведуваат дека во итните амбуланти најчесто се чека меѓу еден и три часа.

Истражувањето на „Blue Cross Blue Shield Health Index“ од 2019 година покажало и дека помалата склоност на миленијалците да изберат матичен лекар може да биде поврзана со помал интерес за превентивни прегледи во споредба со постарите генерации.

Покрај тоа, истражувањето на „HealthEquity“ од 2026 година покажало дека 46 проценти од миленијалците го одложуваат одењето на лекар кога имаат здравствени тегоби, додека истото го прават 29 проценти од бејби-бумерите.

Тоа значи дека помладите лица почесто бараат лекарска помош дури кога симптомите ќе станат посериозни и кога сакаат што побрзо да бидат прегледани.

Зошто е корисно да имате матичен лекар?

Иако итните амбуланти можат да бидат практично решение за акутни здравствени проблеми, експертите истакнуваат дека долгорочниот однос со матичниот лекар носи бројни предности.

Докторката Триша Херстен наведува дека лекарот кој со години го следи истиот пациент многу подобро ја познава неговата здравствена историја и полесно може навреме да препознае состојби како покачен холестерол, депресија или рак на грлото на матката.

Таквиот континуитет во здравствената грижа може да придонесе за порано откривање на болестите, но и да ги намали трошоците за лекување, бидејќи лекарот, познавајќи ја здравствената историја на пациентот, поретко препорачува непотребни и скапи испитувања.

Освен тоа, матичниот лекар може да помогне да се процени кои симптоми бараат итна медицинска интервенција, а кои можат да се следат или лекуваат без потреба од итен третман.