Појадокот на основа на шведска маса за многумина е еден од омилените делови од престојот во хотел. Изборот е голем, порциите не се ограничени, а на едно место има јајца, пецива, овошје, месо, намази и слатки. Сепак, изобилството од храна не значи дека секој понуден залак е подеднакво добар избор.

Микробиологот Џеј Тетро предупредува дека посебно внимание треба да се обрне на намирниците што долго стојат отворени и од кои гостите сами се послужуваат со заеднички лажици. Токму тогаш се зголемува можноста некој да ја допре храната или приборот и така да ја контаминира. Особено проблематични се намазите и додатоците како џем, мармалад, мајонез, путер од кикиритки и преливи за салата кога се наоѓаат во големи, отворени садови.

Сепак, не е пресуден само видот на храната. Многу е поважно дали таа е правилно подготвена, заштитена и чувана на соодветна температура.

Отворени намази

Малите, фабрички затворени порции џем, путер или сирење, главно, се попрактичен избор од големите садови што во текот на утрото ги користат голем број гости.

Проблемот настанува кога истата лажица повеќепати се враќа во садот, се остава на масата или се допира со раце. Затоа е подобро да избирате поединечно спакувани производи или садови што имаат соодветни капаци и чист прибор.

Кајгана и други јадења од јајца

Кајганата не треба автоматски да се избегнува само затоа што е послужена на шведска маса. Важно е, меѓутоа, да биде добро термички обработена и доволно топла.

Американската управа за храна и лекови предупредува дека јајцата и јадењата од јајца бараат внимателна подготовка и контрола на температурата, бидејќи недоволно обработените јајца можат да претставуваат ризик од салмонела. Топлата храна на шведската маса треба да се одржува на температура од најмалку 60 степени.

Доколку кајганата е млака, сува по рабовите или изгледа како долго да стоела, побезбедно е да почекате нова тура.

Месо и колбаси

Сланината, колбасите и другите месни преработки брзо го губат вкусот и текстурата кога со часови стојат во садови за загревање. Освен што можат да станат мрсни и исушени, проблем настанува доколку не се одржуваат на доволно висока температура.

Храната што бара ладење или загревање не треба да остане на собна температура подолго од два часа. Бактериите што предизвикуваат труење со храна не мора да го променат нејзиниот мирис, вкус или изглед, па не може секогаш да се процени дали јадењето е безбедно само врз основа на изглед или мирис.

Исечено овошје

Цело јаболко, банана или портокал обично се подобар избор од овошна салата што со часови стои незаштитена. Исеченото овошје бара правилно миење, подготовка и ладење, а треба да биде изложено во сад поставен на мраз или во разладна витрина.

Ако овошната салата е млака, се наоѓа во голем отворен сад или околу неа има многу истечен сок, подобро е да изберете цело овошје. Претходно исеченото овошје треба да се чува на температура од околу пет степени или пониска.

Сирови остриги

Најголема претпазливост е потребна кај сировите остриги и другите недоволно обработени школки. Тие можат да содржат бактерии од родот Vibrio, но и вируси како норовирусот.

Проблемот е што според изгледот, вкусот и мирисот не може да се препознае дали остригата е контаминирана. Американскиот центар за контрола и превенција на болести наведува дека правилната термичка обработка претставува најсигурен начин за уништување на штетните микроорганизми.

Особено треба да ги избегнуваат бремените жени, постарите лица, луѓето со ослабен имунитет и оние што имаат посериозни хронични заболувања.

Палачинки и пржени компири

Палачинките и пржените компири не се нужно здравствено ризични, но брзо го губат квалитетот. Компирот станува мрсен и мек, додека палачинките се сушат и стануваат жилави.

Најдобро е да ги земете кога се подготвуваат пред гостите или кога персоналот токму изнесува нова количина. Ако веќе долго стојат во млак сад, подобро е да изберете нешто свежо.

Житарките не се опасни, но можат брзо да го вратат чувството на глад

Сувите житарки сами по себе, главно, не претставуваат ист ризик како јајцата, месото или школките. Сепак, многу видови содржат големо количество шеќер и малку протеини и растителни влакна, поради што чувството на ситост може да трае кратко.

Подобар појадок може да се направи со комбинирање овесни снегулки, обичен јогурт, јаткасти плодови и свежо овошје. Така се добива оброк што подолго заситува и не предизвикува нагол пад на енергијата.

Како да препознаете добро организирана шведска маса?

На уредно хотелско бифе, ладните намирници се наоѓаат во разладни витрини или на мраз, додека топлите јадења се чуваат во соодветни садови за загревање. Храната се изнесува во помали количества и редовно се дополнува, приборот е чист, а садовите се заштитени од допирање и кивање.

ФДА препорачува новите количества храна да не се додаваат врз остатоците што веќе долго стојат, туку речиси празниот сад да се замени со чист и свежо наполнет.