Најновата сезонска прогноза на Европскиот центар за среднорочни временски прогнози („ECMWF“), заснована на ансамбл од 51 нумеричка симулација, испраќа прилично јасен сигнал: крајот на летото, целата есен и почетокот на зимата во регионот многу веројатно ќе бидат потопли од климатскиот просек, пишува „N1“.

Во последните десетина години речиси сите сезонски модели го покажуваат истиот тренд – температурите растат, додека врнежите стануваат сè потешки за предвидување. Овогодишната прогноза е особено интересна бидејќи доаѓа во период кога истовремено се развиваат неколку големи климатски процеси кои можат меѓусебно да влијаат еден врз друг.

Првиот е развојот на нова епизода на Ел Нињо во рамките на циклусот „ENSO“ во тропскиот Тихи Океан. Вториот е и натаму многу топлиот северен Атлантик и режимот на неговите морски струи, а третиот е рекордно загреаното Средоземно и Јадранско Море, кои по летото влегуваат во есента со огромна количина акумулирана топлина.

Во долгорочните временски прогнози не се анализираат поединечни метеоролошки појави, туку меѓусебното влијание на глобалните климатски процеси. Дури кога „ENSO“, состојбата на Атлантскиот Океан, температурата на Средоземното Море и сезонските модели ќе почнат да го покажуваат истиот сигнал, може да се зборува за зголемена веројатност за одреден развој на атмосферските процеси и временските услови во подолг временски период од неколку тримесечја или половина година.

Доколку во текот на есента Ел Нињо дополнително се засили, како што во моментов сугерираат океанските и атмосферските показатели, неговото влијание би можело да почне да се чувствува токму во текот на ноември и декември.

Во исто време, многу топлото Средоземно Море ќе остане важен извор на топлина и влага за развој на циклони. Поради тоа, реално е да се очекува и оваа есен да се менуваат подолги стабилни периоди со епизоди на многу интензивни врнежи и изразени временски непогоди.

Со други зборови, не се менува само просечната температура, туку и динамиката на атмосферата. Токму зголемената количина расположлива енергија би можела да биде едно од главните обележја на времето во текот на втората половина од годината.

Септември како продолжение на летото

Септември би можел повеќе да наликува на продолжение на летото отколку на почеток на климатолошката есен. Температурата на морето ќе остане повисока од просекот, што значи дека Средоземното и Јадранското Море и понатаму ќе бидат важен извор на топлина и влага за развој на циклони.

Топла зима

Сезонскиот модел покажува дека почетокот на климатолошката зима би можел да остане потопол од просекот. Тоа, сепак, не значи дека нема да има продори на студен воздух.

Напротив, токму за време на Ел Нињо атмосферата често станува подинамична. Наместо долготрајни периоди на стабилен студ, можно е почесто да се менуваат топли југозападни воздушни струења и краткотрајни, но многу изразени продори на поларен воздух од север и североисток.

Таквата конфигурација придонесува за силно меандрирање на млазната струја, развој на фронтални системи и брза промена на временските услови.