Еден автомобил не е доволен за да се донесе конечен суд за сите електрични возила, но овој тест покажува дека батеријата не мора да биде „потрошна стока“.
Стравот од скапото деградирање на батеријата и понатаму е една од главните причини поради кои дел од купувачите се двоумат да купат користен електричен автомобил. Долгорочниот тест на германскиот „ADAC“ сега нуди прилично убедлив одговор. „Volkswagen ID. 3“, стар пет години и со повеќе од 220.000 изминати километри, задржал дури 89 проценти од својот првичен капацитет на батеријата.
„ADAC“ го презеде „ID. 3 Pro S“ во мај 2021 година токму со цел да ја провери издржливоста на електричниот погон во реална и интензивна употреба. Тестниот автомобил располага со батерија со нето капацитет од 77 kWh, моќност од 204 КС и погон на задните тркала, а за пет години поминал километража што повеќето патнички автомобили не ја достигнуваат ниту по една деценија или повеќе.
Независното мерење покажало дека батеријата има 89 проценти „здравје“, со можна толеранција од три процентни поени. На 160.000 километри оваа вредност сè уште изнесувала околу 91 процент.
Резултатот е уште поинтересен ако се земе предвид дека автомобилот не бил третиран со посебно внимание. Често се полнел на брзи „DC“ полначи, батеријата редовно се полнела до 100 проценти, а „ID. 3“ понекогаш останувал паркиран со целосно наполнета батерија и по неколку дена. Токму таквите навики најчесто не се препорачуваат кога целта е максимално да се забави стареењето на батериските ќелии.
И покрај тоа, загубата на капацитет по 220.000 километри изнесува само околу 11 проценти.
„Volkswagen“ за батеријата гарантира најмалку 70 проценти од првичниот нето капацитет во период од осум години или до 160.000 километри, во зависност од тоа што ќе настапи прво. Автомобилот на „ADAC“ ја надминал оваа километража уште во текот на 2025 година, но и понатаму е далеку од вредноста при која во рамките на гаранцијата би имал право на поправка или замена на батеријата.
Големата километража и деградацијата на батеријата не ја намалиле ниту неговата способност за долги патувања. Според „ADAC“, при умерено возење на автопат автомобилот и понатаму може да помине околу 400 километри, додека во зима, при температури под нулата, реалниот досег се намалува на приближно 300 до 320 километри.
По софтверско ажурирање, максималната моќност на полнење се зголемила од приближно 125 на повеќе од 160 kW, а полнењето од 10 до 80 проценти трае околу половина час.
Проблем при полнењето и понатаму претставува студената батерија, бидејќи постарите верзии на „ID. 3“ немаат можност за рачно активирање на предзагревање на батеријата пред пристигнување на полнач.
Софтверот донел уште една неочекувана придобивка. Потрошувачката измерена во тестот „Ecotest“ на „ADAC“ се намалила од почетните 20 на 18,3 kWh/100 km, вклучувајќи ги и загубите при полнењето, бидејќи поновата верзија на софтверот поефикасно управувала со загревањето на батеријата.
Вкупниот просек во текот на сите 220.000 километри сепак изнесува 23 kWh/100 km, поради големиот удел на возење по автопат и честата употреба во текот на студените зимски месеци.
И остатокот од автомобилот се покажал во добра состојба. „ID. 3“ го поминал техничкиот преглед на 217.000 километри без никакви забелешки, а биле извршени само два редовни сервиси.
Меѓу поголемите дефекти биле поправка на погонската осовина, дефект на „GPS“ антената, замена на 12-волтната батерија, паркинг-сензорот и механизмот на капакот на приклучокот за полнење. Освен почетното трошење на едно гумено лежиште, суспензијата останала во многу добра состојба.
Еден автомобил не е доволен за да се донесе конечен суд за сите електрични возила, но овој тест покажува дека батеријата не мора да биде потрошна стока што по неколку години ќе го направи автомобилот безвреден.
Доколку досегашното темпо на деградација продолжи, овој „ID. 3“ би можел да помине уште многу десетици илјади километри пред загубата на капацитетот посериозно да ја ограничи неговата секојдневна употребливост.
Поради тоа, „ADAC“ го продолжува тестирањето, а следната контролна точка ќе биде на 250.000 километри.
Денес
