Во Скопје од 3 до 9 август 2026 се одржува седмото издание на Флипбук филм фестивал, каде ќе бидат прикажани 185 анимирани филмови на три различни локации, вклучувајќи бројни наградувани европски остварувања и нови програми за млада публика.
Од 3 до 9 август 2026 година во Скопје се одржува седмото издание на Флипбук филм фестивал, кое годинава првпат се проширува на седум фестивалски дена и три локации – КОТУР, Кинотеката и просторот „Sе“. Во шесте фестивалски селекции ќе бидат прикажани вкупно 185 анимирани филмови: 27 филмови во главната конкуренција, 31 во студентската, 13 анимирани документарни филмови, 25 анимирани музички видеа, 53 филмови во Европската панорама и 36 филмови во новата програма за млада публика „Бумбар“.
Фестивалот започнува со тридневната Европска панорама, која од 3 до 5 август се одржува во КОТУР. Во програмата се вклучени повеќекратно наградувани европски остварувања, меѓу кои Water Girl на Сандра Десмазие, добитникот на Гран-при на Анимафест Dull Spots of Greenish Colours на Саша Свирски и латвискиот филм Freeride in C на Едмундс Јансонс.
Официјалното отворање ќе се одржи на 6 август во паркот на Кинотеката, а вечерта ќе продолжи со патувачката програма WTF OFF, избор од неконвенционални, провокативни и визуелно радикални анимирани филмови, која лично ќе ја претстави нејзиниот селектор Себастијан Сперер. Во главната конкуренција годинава се вклучени дел од најзабележителните современи авторски филмови, како Please на Ана Манцарис, Winter in March на Наталија Мирзојан, Dollhouse Elephant на Јени Јокела, A Pint of Bitter на Конор Кехили, како и продукциите на Националниот филмски борд на Канада Bread Will Walk и Paradaïz.
За наградите во главната и студентската конкуренција ќе одлучуваат наградуваниот автор на куклена анимација, англичанецот Томас Волда, режисерката, продуцентка и директорка на фестивалот Аниматор во Србија, Марија Вулиќ и босанската режисерка Алета Рајиќ. Филмовите во конкуренциите за анимиран документарен филм и анимирано музичко видео ќе ги оценуваат словенечката продуцентка Тина Смрекар, аниматорот и режисер Вук Јевремовиќ и хрватскиот режисер Марко Мештровиќ. Членовите на жирито ќе учествуваат и во придружната програма преку мастер-класови, ретроспективи, презентации и изложби.
Новата програма „Бумбар“, наменета за деца над седум и за млади над дванаесет години, ќе се одржува на 8 и 9 август во Кинотеката. Покрај 36 внимателно избрани кратки филмови, програмата опфаќа и работилници за изработка на флипбук, развој на сценарио и продукција на краток анимиран филм со еколошка тематика, организирани во соработка со „Еко-свест“. Организацијата Еко-свест и годинава ќе додели награда за најдобар филм со еколошка тематика.
Придружната програма вклучува изложби на цртежи, кукли и сценографии, мастер-класови посветени на куклената и авторската анимација, разговори со авторите и членовите на жирито, како и вечерни фестивалски средби, забави и караоке. На 7 август ќе биде отворена изложбата „Between Frames“, со кадри, кукли и сценографии од автори застапени во натпреварувачките програми, додека на 9 август Вук Јевремовиќ ќе одржи мастер-клас и ќе ја претстави својата изложба на цртежи и графики.
Денес
