Мајсторот-кројач, кој шиел одела за оперската ѕвезда Лучано Павароти, ќе мора да плати судски трошоци во износ од 110.000 фунти (речиси 130.000 евра), откако судот утврди дека самиот ја уништил својата колекција вина, вредна околу еден милион фунти, така што ги исклучувал разладните уреди поради поплаките на соседите за бучавата.
Кројачот и познавач на вина Том Рајмер ја тужел компанијата што ја вградувала кујнската опрема, барајќи отштета од 550.000 фунти (околу 645.000 евра), тврдејќи дека фрижидерите што пропуштале воздух во неговиот луксузен стан, вреден осум милиони фунти (околу 9,3 милиони евра), предизвикале појава на мувла на неговата колекција вина.
Милионерот тврдеше дека процепот од еден сантиметар меѓу вратите на фрижидерот овозможил навлегување воздух, поради што колекцијата пропаднала.
Сепак, судијата ја отфрли неговата тужба и му наложи да плати 110.000 фунти судски трошоци, откако беше утврдено дека повеќепати го исклучувал напојувањето на специјално дизајнираниот ѕид за чување вина, бидејќи соседите се жалеле дека уредите создаваат „бучава и вибрации“ што се чувствувале и во нивниот соседен стан.
Pavarotti's tailor caused his own £1million French wine collection to go mouldy by turning off 'noisy' fridges after neighbours complained, judge rules - as he is handed £110k court bill https://t.co/v8xUAj7b4A
— Daily Mail (@DailyMail) July 30, 2026
Голем дел од колекцијата на Рајмер ја сочинувале престижни вина од категоријата „Premier Cru“ од францускиот регион Бордо, како и скапи вина од долината Рона.
Меѓу нив имало и шишиња од виното „Château Mouton Rothschild“ од бербата 1982 година, чија цена за едно шише може да надмине 1.700 евра.
Ова црвено вино е познато по тоа што добило максимални 100 од 100 поени од славниот американски вински критичар Роберт Паркер, а етикетата за таа берба ја насликал и потпишал американскиот режисер Џон Хјустон, автор на легендарниот филмски класик „Maltese Falcon“ од 1941 година.
Во разладните витрини се наоѓале и шишиња од виното „Château Pétrus Pomerol“ од бербата 2012 година, чија цена се движи меѓу 2.900 и 4.200 евра по шише. Ова вино се смета за едно од најценетите во светот, бидејќи годишно се произведуваат само околу 30.000 шишиња од мало лозје со површина од 28 акри, источно од Бордо.
Мајсторот-кројач Рајмер е голем љубител на виното и поседува колекција од околу 20.000 врвни шишиња, кои ги чува во своите домови во Лондон и Германија.
Рајмер тврдеше дека вредноста на неговата лондонска колекција значително се намалила поради дефекти на трите разладни уреди изработени по нарачка, кои го сочинуваат специјално дизајнираниот „ѕид за вино“, вграден при реновирањето на неговиот стан вреден осум милиони фунти во луксузниот комплекс „The Regent“ во лондонската населба Мерилебон во 2021 година.
Системот за ладење, дизајниран да одржува температура од 12 до 13 степени Целзиусови, имал лизгачки стаклени врати и далечински кондензатори, а неговата инсталација го чинела господинот Рајмер околу 27.000 евра.
Кројачот призна дека двапати самиот ги исклучил фрижидерите, но судијката Сара Елингтон утврди дека тоа се случило „значително повеќе пати“. Таа оцени дека Рајмер постапил „неразумно“, исклучувајќи ги уредите без претходно да ги извести своите добавувачи.
Судијката Елингтон во својата пресуда наведе: „Сметам дека беше неразумно едноставно да ги исклучи. Можеше да го премести виното во складиште додека (уредите) се заменуваа, можеше да ја извести Меѓународната служба за храна дека смета оти ќе мора да ги исклучи единиците.“
Рајмер, потомок на богато германско семејство, изгради многу успешна кариера како врвен кројач во Хамбург, каде што во деведесеттите години неговата компанија го облече Павароти во бел свилен фрак, како контраст на неговите вообичаени црни фракови и бела вратоврска.
